Хичээлийн шинэ жил эхлэхээс хэдхэн хоногийн өмнө Хонконгийн оршин суугчид сургуулийн хичээлийн хөтөлбөрөөр дамжуулан хүүхдийн тархи угаахыг эсэргүүцэж, жагсчээ. Өнгөрсөн долоо хоногийн эхээр яг энэ асуудлаар оюутнууд 72 цагийн өлсгөлөн зарлаж байсан бол өнгөрсөн амралтын өдөр 8000 гаруй эцэг эхчүүд хүүхдүүдтэйгээ хамт эсэргүүцлийн цуглаанд оролцжээ. Цуглаанд эцэг эхчүүдээр зогсохгүй сургуулийн багш нар ч өөрсдөө оролцож, хотын захиргаанаас баталсан боловсролын сургалтын хөтөлбөрийг эсэргүүцжээ.
Тэд дунд сургуулийн хичээлийн хөтөлбөрт “Ес суртахуун ба үндэсний боловсрол” гэсэн хичээл багтааж, түүгээрээ дамжуулан Хятадын коммунист дэглэмийн давуу талыг сурталчлан ухуулах гэж буйг эсэргүүцэж байгаа юм.
Хонконг хэдийгээр Хятадын нэг хэсэг боловч олон арван жил Их Британийн колони байсны хувьд эх газраас нэлээд онцлогтой, хүн ардынх нь сэтгэлгээ ч өөр байдаг. Тийм ч учраас дунд сургуулийн хичээлийн хөтөлбөрт зөвхөн нэг талыг барьсан агуулга бүхий түүхийн хичээл орж, бяцхан хүүхдүүдэд буруу ойлголт төрүүлж болохгүй хэмээн эрс эсэргүүцэж байгаа нь энэ. Цуглаанд оролцсон эцэг эхчүүд “Коммунизмын үеийн Хятадын түүхийг хүүхдүүд бүхий л талаас нь үзэж судлах хэрэгтэй. Аль нэг талыг нь илүү баримталсан суртал ухуулга хүүхдэд бүрэн мэдлэг боловсрол өгч чадахгүй” гэж ярьж байна.