Наймдугаар сарын сүүлийн долоо хоногт Умард Кавказад Оросын холбооны хүчний 15 цэрэг офицер амь үрэгдэж 11 хүн шархадсан нь 10 жилийн өмнө энд ид дайн болж байх үеийн эмгэнэлт тоо баримттай бараг дүйж байгаа юм. “Хэрэв Кавказ дахь цэргийн албан хаагчид руу ингэж халдаад байх юм бол зэвсэгт бүлэглэл, дайчдын эсрэг манай цэрэг идэвхтэй ажиллагаа явуулж устгах болно” гэж ОХУ-ын батлан хамгаалах яамны эх сурвалжаас “Независимая газета” сонин мэдээлсэн байна. Сонин “Хууль сахиулагчид болон тусгайнхантай хамтраад зэвсэгт дайчдыг устгах бүрэн боломжтой” гэж дэслэгч генерал Юрий Неткачевын мэдэгдсэнийг онцолжээ. Тэр бас Зэвсэгт хүчний Тагнуулын удирдах  газрын тусгай отряд Умард Кавказад шинэ ажиллагаа явуулахаар бэлтгэж, тусгай төлөвлөгөө хийж байгаа гэсэн байна.