Боловсролын салбарын төсвийн асуудлаар өчигдөр БШУ-ы сайд хэвлэлийнхэнд мэдээлэл өгсөн. Энэ үеэр сэтгүүлчдийн тодруулсан асуултын хариултыг хүргэж байна.
“Бид боловсролын чанарт суурилсан үнэлгээний тогтолцоог нэвтрүүлэхийг зорьж байгаа. Өнгөрсөн жилүүдэд хүртээмж их ярилаа. Хувьсах зардлаар дамжуулж чанар, үр дүнд суурилсан гүйцэтгэлийн зардлыг олгох ёстой. Хувьсах зардлын энэ мөнгийг багш нарын цалин урамшуулал, багшийн хөгжлийн асуудал, хүүхдийн сурлагын ахиц дэвшилд зарцуулдаг болгохыг зорьж байна.
Цаашид өндөр төлбөртэй хувийн сургуулиудад хувьсах зардал өгөхгүй. Тэр тусмаа жилийн 10 сая төгрөгөөр дээш төлбөртэй сургуулиудад өгөхгүй. Үүнтэй холбоотой Үндсэн хууль зөрчлөө гэдэг асуудал яригддаг. Гэхдээ 10 саяас дээш төлбөр авчхаад ахиад төрөөс хувьсах зардал авна гэж гоншигнох сургууль байхгүй болов уу гэж бодож байна.
Өнгөрсөн жил бид өндөр төлбөртэй хувийн сургуулиудын хувьсах зардлыг хэмнэснээр гурав орчим тэрбум төгрөгийг хичээлийн хоцрогдол арилгахад зарцуулж эхэлсэн”.
