Сагсан бөмбөгийн уралдаан, тэмцээн, шоу үзүүлбэр, секц дугуйланг сүүлийн найман жил тасралтгүй амжилттай зохион байгуулж буй “TLG13” ТББ энэ жилээс Монголын үндэсний сагсан бөмбөгийн холбоотой хамтран ажиллаж эхэллээ. 2012-2013 оны сагсан бөмбөгийн цоо шинэ улирал “Спрайт хөгжлийн D лиг”-ээр эхлэх юм байна. Тэмцээн энэ сарын 22-ны өдөр эхлэх бөгөөд одоогийн байдлаар хөгжлийн лигийн аваргын төлөө 40 гаруй баг өрсөлдөхөө мэдэгдээд байгаа аж. Спрайт хөгжлийн лигээс шалгарсан шилдэг найман баг Спрайт супер лигт оролцох эрхтэй болно. Мөн энэ жилээс эхлэн Спрайт лиг сонирхогчийн гэсэн тодотголоо хадгалж дээд лигийн тамирчин оруулахгүй болсон нь ажилчин залуусын чөлөөт цагаа зөв боловсон өнгөрүүлэх томоохон лиг болон цар хүрээгээ улам нэмж байна.Монголын үндэсний сагсан бөмбөгийн холбоо болон “TLG13” ТББ хамтран аравдугаарсарын сүүлээр дээд лигийн шилдэг найман баг, Спрайт супер лигийн шилдэг найман багаас бүрдсэн “Холбоодын цом” тэмцээн, арваннэгдүгээр сард сагсан бөмбөгийн “Их наадам”-ыг зохион байгуулахаар төлөвлөөд байна. Сагсан бөмбөгийн “Их наадам”-ын тухайд ахмад, залуучууд, өсвөр үе гэсэн насны ангилалтайгаар зохиогдох юм. Эдгээр тэмцээний дараагаар урлаг спортын алдартнуудын сагсан бөмбөгийн телевизийн шоу, сурагчдын дундах “Мөрөөдлийн баг” тэмцээнүүдийг зохион байгуулахаар мөн төлөвлөсөн ажээ.