АТГ-ын Мөрдөн шалгах хэлтсээс Нийслэлийн худалдан авах ажиллагааны газрын хоёр ажилтанг авлига авсан, албан тушаалаа урвуулан ашигласан хэрэгт сэжигтэнээр татан саатуулан шалгаж эхэлжээ. Тэд өөрсдийн албаны чиг үүрэг, эрх мэдлээ хэтрүүлэн, хахууль өгөгчийн ашиг сонирхолд нийцүүлэн нэр бүхий аж ахуйн нэгжид давуу байдал бий болгон сонгон шалгаруулж, хахууль авсан нь мөрдөн шалгах ажиллагаагаар тогтоогдсон байна. Нийслэлийн худалдан авах ажиллагааны зарим ажилтан, албан хаагчид хахууль авч байгаа тухай Засгийн газрын иргэд, олон нийттэй харилцах 11-11 төвд нэрээ нууцалсан иргэнээс мэдээлэл ирсэний дагуу холбогдох шалгалтыг явуулан илрүүлжээ.