Чингисийн Монгол гэж овоглодог хирнээ бид Чингис хааны музейг өөр улсад очиж үздэг байсан цаг саяхан. Өвөр монголд гэхэд маш том цогцолбор бий. Чингис хааны түүхтэй холбоотой хөшөө, дурсгал,музей гээд бусад улс орнууд үзүүлэх харуулах юм өчнөөн хийсэн.

Өнөөдөр харин Чингисийн Монгол их эзэн хааныхаа музейг нээлээ. Энэ үйл явдал бол Монгол хүн бүрийн бахархал төдийгүй өв соёлоо хойч үедээ өвлүүлэн үлдээх, чингис хаан Монголын их хаан гэдгийг дэлхийд дахинд тамгалах бүтээн байгуулалт юм. Их эзэн хаан бол Монголчуудын туулсан түүхийн туг сүлд, эвлэн нэгдэхийн бэлгэдэл, монгол хүний мөн чанарын илэрхийлэл билээ.