С.Эрдэнэ даргатай АН-ынхан өнгөрсөн долоо хоногт Үндэсний бодлогын хорооны хуралдаанаа хийсэн. Энэ хурал АН-ын залуусын хүчгүйг, тэмцэх чадваргүйг дахиад л харуулсан. С.Эрдэнэ М.Тулгатыг үг хэлэх гэхэд нь хэлүүлэлгүй микрофоныг салгасан.
Харин энэ үеэр Монгол Улсын Ерөнхийлөгч, Ерөнхий сайд, АН-ын дарга асан Ц.Элбэгдорж үг хэлсэн. Тэрбээр үг хэлэхдээ. С.Эрдэнийг шүүмжилж, байр сууриа илэрхийлсэн.
Ер нь ч Ц.Элбэгдорж сүүлийн үед хоёр талд буй АН-ынхнаа цуглуулж идэш уушны газарт уулзан нэгдье, тэмцье гэж яваа. Эхлээд С.Эрдэнэ, Х.Баттулга хоёроос бусад намынхаа лидер асан хүмүүсийг Шангри Лад цуглуулж уулзсан. Дараа нь УИХ-д сууж буй АН-ынхаа төлөөлөл болсон гишүүтэй уулзсан. Үүний дараа ийнхүү ҮБХ-ны хурал дээр С.Эрдэнэд хандан дараах шүүмжлэлийг хэлсэн юм.
Ц.Элбэгдорж “Одоо МАН-ын тоглоомын төслийн тоглогчид байх аа болио, хангалттай. Өнөөдрөөс АН-ын Үндэсний бодлогын хороо асуудлыг гартаа авсан. Энэ АН-ын нэр, тамгыг яаж үнэд хүргээд зарчих вэ гэдгийг хүлээж суухаа болио. Энийг дэмжиж суухаа болих хэрэгтэй. Юу вэ, С.Эрдэнэ энэ Үндэсний бодлогын хорооныхоо гишүүдийн дунд ороод суу. Юун ганцаараа индер дээр суудал засаад суучихсан байгаа юм. Хурал руу ороод гишүүдийнхээ дунд ороод суучих нүүргүй л байна шүү дээ. Бүгд харж байгаа шүү дээ, одоо болсон. Дотроо ороод нэр нүүрээ харуулаад ярь” гэсэн.
Мөн АН-ын залуучууд тэмцэх чадваргүй болсон тухай Б.Баабар өрөвдөж, МАН-ынхаар жишээ татан твиттерт жиргэж байна лээ. Тэрбээр “Нэг нь зай тавьж нөгөөдүүл нь ирдэг юм улстөрд байхгүй. Алалдаж тэмцэлдэж өрсөлдөн гарч ирдэг. МАН зай тавилцсан юм огт үгүй. “Миеэ хулгайчаа гараад ир алаад өгье” гж хэдүүлээ орилсоор байгаад зайлуулан оронд нь өөрснөө гарч ирснийг та бид бүгд харсан. АН-ын залуус хөөрхийдөө…” гэнэ билээ.
Энэ бүхэн С.Эрдэнийг шахаж Ц.Элбэгдорж хоёр хуваагдсан АН-аа нэгтгэж эргэн улстөрд орохоор зүтгэж буйг харуулж байна.
