2022 оны 12 дугаар сарын 04-ний өдрөөс өнөөдрийг хүртэл үргэлжилж буй “Нүүрсний хулгай”-н эсрэг жагсаал, цуглааныг Ардчилсан нам анхааралтай ажиглаж буй билээ.

Ардчилсан намын зүгээс “Нүүрсний хэмээх 40 их наядын хулгай”-н хэрэгт холбоотой гэм буруутныг Монгол Улсын Засгийн газар нэн яаралтай зарлах ёстой гэсэн байр суурьтай байна.

Гэтэл нийгмийг доргиосон энэхүү үйл явдалтай холбогдуулан Ардчилсан намын гишүүд, дэмжигчдийг харлуулах, улс төрийн зорилготой шинэ цагийн хэлмэгдүүлэлт ээлж дараалан гарах боллоо.

Энэхүү хэрэгт Ардчилсан намаас Баянхонгор аймагт нэр дэвшиж, сонгогдсон УИХ-ын гишүүн А.Адъяасүрэн, Ардчилсан намаас Өмнөговь аймагт нэр дэвшиж, сонгогдсон УИХ-ын гишүүн Д.Бат-Эрдэнэ нарыг холбоотой мэтээр олон нийтэд мэдээлэл түгээж байна.

Мөн Ардчилсан намын ҮБХ-ны дарга Т.Мөнхбаярыг “нууц” гэх хэргээр өнөөдөр баривчлан саатууллаа. Т.Мөнхбаяр нь нүүрс олборлох, тээвэрлэх, экспортлох үйл ажиллагаанд огт оролцож байгаагүй бөгөөд тэрээр 228,5 мянган ахмадын тэтгэврийн зээлийг тэглэх, 216 мянган зээлгүй ахмадуудад 1 сая төгрөг олгох ажлыг гардан зохион байгуулсан нэгэн юм.

Мөн Ардчилсан намын Тэргүүн дэд дарга Ө.Шижирийг гадаад руу зугтсан мэтээр олон нийтэд түгээж, худал ташаа мэдээллийг цахим орчинд түгээж байна.

Гэтэл эрх барьж буй МАН “нүүрсний хулгайчид”-аа зарлахгүй, УИХ дахь МАН-ын бүлгийн дарга Д.Тогтохсүрэн 2022 оны 12 дугаар сарын 05-ны өдөр хийсэн мэдэгдэлдээ “Манай намд нүүрсний хулгайч байхгүй” хэмээн илт худал мэдэгдэв.

Энэ нь жинхэнэ нүүрсний хулгайчид нуугдаж буй Монгол Улсын Засгийн газрын кабинет, УИХ гэх мэт хулгайчдын үүрийг илт хамгаалж, монголын ард түмнийг гутаан доромжилсон үйлдэл мөн.

Цаашид нүүрсний хулгайн хэрэгтэй холбоотойгоор МАН-ын улс төр, бизнес дамнасан гэмт этгээдүүдээ зарлахгүйгээр Ардчилсан намын УИХ-ын гишүүд болон бизнес эрхлэгчид, жирийн гишүүдийг харлуулах үйл ажиллагаа гаргавал бид хатуу тэмцэх болохоо дахин мэдэгдье.

АРДЧИЛСАН НАМ

2022.12.08