Японд халимын мах, лаазалсан эмгэн хумс, иддэг шавж зардаг автомат машинууд байдаг. Харин одоо шинээр баавгайн махан зуушны машин тавиад байна.

Майничи Шимбүн сонины мэдээлснээр, Японы  Хоншю арлын хойд хэсэгт орших Сэмбокү хотын галт тэрэгний буудалд төрөл бүрийн  баавгайн мах зардаг автомат машин тавьсан байна. Баавгайн махны 250 грамм бүтээгдэхүүнийг 2200 иенээр (59 мянган төгрөг) худалдан авах боломжтой. Автомат машиныг орон нутгийн нэгэн ресторан суурилуулсан бөгөөд долоо хоногт 10-15 боодол бүтээгдэхүүн зарж байна гэж удирдлагууд нь мэдэгджээ.

Түүхий эдээ ойролцоох ууланд хар баавгай агнадаг нутгийн анчдаас авдаг байна. Хэрвээ ан ав байхгүй бол машин ч бүтээгдэхүүнгүй болдог аж.
    
Японы хар баавгайг хамгаалалтад авах шаардлагатай гэж үздэг байна. Гэхдээ тус улсад хязгаарлагдмал тоогоор агнах зөвшөөрлийг олгодог байна. Эрх баригчид хар баавгайн 12 хувийг буудах зөвшөөрөл олгодог бөгөөд Японд өдгөө 15,000 орчим тоо толгой байдаг гэжээ. Ийм тооны баавгай нь махны эх үүсвэр болох төдийгүй хүмүүст ч аюул учруулдаг.

Сэмбокү хот оршдог Акита мужийн ойролцоох Мияги мужид баавгай дөрвөөс есдүгээр сарын хооронд таван удаа хүмүүс рүү дайрсны улмаас долоон хүн шархаджээ. Баавгай хоол хүнс нь багассан үед суурин газар руу бууж ирэх нь ихэсдэг гэж эрдэмтэд ярьсан байна.

Япон улс нэг хүнд ногдох автомат машины тоогоор дэлхийд тэргүүлдэг. Автомат машиныг алслагдсан тосгонд хүртэл  суурилуулсан байдаг аж. 1960-аад онд Америкаас гаралтай автоматууд богино хугацаанд олны дунд түгэх болж, худалдааны соёлын чухал хэсэг болсон. Тэдний тоо, олон янз байдаг нь зочдыг гайхшируулдаг байна.

Эх сурвалж: ВВС