Төрийн ордны хашааны зүүн талын явган замыг хааж гуравдугаар сарын 25, 26-ны амралтын өдөр хашаа барьсан. Ордны хашааг засварлах зорилгоор уг хашааг барьсан хэмээн тайлбарласан юм. Ордны зүүн талын иргэд зорчдог явган замыг хэзээ нээх талаар Төр засгийн үйлчилгээ эрхлэх газрын Барилгын инженер, техникийн хэлтсийн дарга Т.Болдбаатараас тодрууллаа.

-Төрийн ордны зүүн талын хашааг өргөтгөн явган хүний замыг оруулж, хашааны суурь цутгаж буй мэт харагдахуйц гэрэл зураг өнөөдөр цахим орчинд нийтлэгдсэн байна. Яагаад иргэдийн алхдаг явган замыг хааж байна вэ?
-Хашааг засварлаад хуучин суурин дээр нь барих юм. Иргэдийн алхдаг явган зам бол Улаанбаатар хотын өмч тул уг замыг огт хашаалахгүй.
Гэрэл зургийг фэйсбүүкээс.

-Явган замыг хэзээ чөлөөлөх вэ?
-Төрийн ордны хашааг өргөтгөх ажил хуваарийн дагуу үргэлжилж байсан боловч амралтын өдөр орсон цасны улмаас хоёр хоног саатлаа. Иргэдийн замыг хаасан өндөр саарал хашааг өнөө орой /2023.04.06/ орой хөл хөдөлгөөн саарах үед буулгаж, явган замыг чөлөөлнө. Мөн ордон руу зүүн хаалгаар нэвтрэх явган гарцны хөдөлгөөнийг маргаашнаас нээх юм. Хашааны засварын ажлыг дөрөвдүгээр сарын 19-ний өдөр нээхээр төлөвлөн ажиллаж байна.

-Төрийн ордны хашаа ямар ч эвдрэлгүй байсан атал яагаад засвар шинэчлэл хийх болов?
-Төмөр хашааны шонг гүн суулгаагүй учир хүнд жинтэй төмөр хашаа иргэдийн эсэргүүцэл, жагсаал цуглааны үед ганхсан. Тиймээс засвар шинэчлэл хийх шаардлага үүссэн гэв.