Тээврийн хэрэгслийн цахим гэрчилгээ буюу RFID чип суурилуулах ажил гуравдугаар сарын 1-нээс эхэлсэн. Эхний ээлжид төрийн байгууллагын машинууд, нийтийн тээврийн автобуснуудад уг чипийг суурилуулах болсон юм. Энэ талаар Нийслэлийн Цахим хөгжил, мэдээлэл технологийн газрын дарга О.Чинзоригоос тодруулахад "Өнөөдрийн байдлаар нийт 1200 төрийн байгууллагын машинууд болон нийтийн тээврийн автобуснуудад цахим гэрчилгээ олгосон. Тавдугаар сардаа багтааж иргэдийн эзэмшлийн болон ААН, байгууллагуудын машинуудыг цахим гэрчилгээтэй болгох ажлыг хийнэ. Эхний ээлжинд цахим гэрчилгээг үнэ төлбөргүй суурилуулна. Харин импортоор орж ирж буй автомашинуудад цахим гэрчилгээ олгох тухай журам хараахан гараагүй байна" гэв.
Тээврийн хэрэгслийн техник хяналтын цахим гэрчилгээ буюу RFID tag -ийг суурилуулснаар авто зам ашигласны төлбөр хураамж, татвар, оношилгоо, даатгал, замын хөдөлгөөнд оролцож буй тээврийн хэрэгслийн мэдээллийн нэгдсэн сан үүсгэж, түгжрэл тодорхой хэмжээнд багасна гэж үзэж байгаа юм. Энэ систем ашигласнаар иргэддээ түгжрэл болон зам тээвэртэй холбоотой мэдээллийг түргэн шуурхай авах боломж бүрдэнэ. Тухайлбал, энэ сард машинаа оношлуулна, таны зорчдог замд засвар хийж байгаа, түр хаасан зэрэг мэдээллийг жолооч нарт өгөх юм. RFID систем нь төрийн байгууллага болон замын хөдөлгөөнд оролцогчдын мэдээлэл солилцоог сайжруулах, нэгдсэн мэдээллийн сан үүсгэх, замын хөдөлгөөнийг хянах, удирдах, дүн шинжилгээ хийх боломж бүрдүүлнэ. Ингэснээр хөдөлгөөний зорчилтыг цахимжуулж, төлбөрийг уян хатан болгох, тодруулбал, торгуулиа тодорхой хугацаанд төлдөг, заасан хугацаанд төлөөгүй бол алданги тооцдог систем бүрдүүлэх аж.
