"The Best", "What's Love Got With It" зэрэг хит дуугаараа хөгжмийн ертөнцөд цойлж рок-н-роллын хатан хаан гэгдэх болсон дуучин Тина Тернер 83 насандаа таалал төгслөө. Сүүлийн жилүүдэд эрүүл мэндийн байдал нь доройтсон тэрээр 2016 онд хорт хавдар тусаж, 2017 онд бөөр шилжүүлэн суулгах мэс засал хийлгэснээс хойш байнгын асаргаа эмчилгээнд байсан юм.

1939 оны арваннэгдүгээр сарын 26-нд Теннесси мужийн Нутбушийн ойролцоо хөвөнгийн тариаланд төрж өссөн Анна Мэй Буллок бяцхан хотынхоо сүмийн найрал дуунаас уран бүтээлийн гараагаа эхэлжээ. Рок, блюз урсгалаар тоглодог Айк Тернертэй танилцан гэр бүл болж, Тина хэмээн нэрээ сольжээ. Гэр бүлийн хүчирхийлэл, мөнхийн зодуур дарамтан дор амьдарч ирсэн Тина 20 жилийн дараа халаасандаа ганцхан доллартай Айкаас зугтаж ганцаарчилсан уран бүтээлээ эхлүүлсэн нь асар их амжилт дагуулж, нэр алдрын оргилд хүрсэн билээ.

Тина Тернер дэлхий даяар өөрийн цомгийг 200 сая хувь борлуулсан, хамгийн алдартай эмэгтэй дуучдын нэгт тооцогддог.