Дархан-Уул аймагт өнөөдөр /2023.09.05/ нэгэн иргэн цахим хуудастаа хүүхдүүдийг нь байрны гаднаас хөтөлж авч явах гэж байсан эмэгтэйн талаар бичлэгийг нийтэлсэн. Бичлэгээс харахад тухайн эмэгтэй хүүхдүүдийг өөрөө төрүүлж, хулгайд алдсан. Тиймээс өөрийн хүүхдүүдээ аваад явч байна гэх агуулгатай зүйлийг ярьсан байгаа юм. Тэгвэл уг асуудлаар хүүхдүүдээ алдах шахсан гэх эмэгтэй цагдаагийн байгууллагад дуудлага өгч, улмаар саатуулсан байна. Энэ талаар цагдаагийн ерөнхий газраас тодруулахад дараах мэдээллийг өглөө.

ЦЕГ-аас өгсөн мэдээллээр "Цагдаагийн байгууллагад есдүгээр сарын 2-ны 19:29 цагт Дархан-Уул аймгийн Дархан сум, 10 дугаар багт “Манай хоёр хүүхдийг авч явах гээд байна” гэх дуудлага, мэдээлэл бүртгэгдсэн.

Дуудлага, мэдээллийн дагуу тус аймгийн цагдаагийн газраас шалгалтын ажиллагаа явуулж, байрны гадна тоглоомын талбайд тоглож байсан 4-6 насны хүүхдүүдийг хөтлөн явсан гэх 23 настай, эмэгтэй “Н” гэгчийг саатуулан, шалгалтын ажиллагаа явуулж байна.

Тухайн эмэгтэйг ямар шалтгааны улмаас хүүхдүүдийг авч явах гэж байсныг тогтоосны дараа хариуцлага тооцох нь тодорхой болно. Ямартай ч эцэг, эх, асран хамгаалагчдыг бага насны хүүхдийн аюулгүй байдлыг хангах, тэдэнд тавих анхаарал, хараа хяналтаа дээшлүүлэхийг цагдаагийн байгууллагаас сэрэмжлүүлж байна" гэлээ.