Хэвлэлийн эрх чөлөөг хязгаарласан, сэтгүүлчийн ажлаа хийхэд саад учруулсан үйлдлийн талаар Монголын сэтгүүлчдийн нэгдсэн эвлэлээс Олон улсын сэтгүүлчдийн холбоонд мэдээлэл хүргүүллээ.

Тухайлбал 2023 оны 12 дугаар сарын 01-02 шилжих шөнө zarig.mn сайтын Монголоос хандах хандалтыг шууд зогсоосон асуудлыг мэдээлэв. Мөн МСНЭ-ээс энэ дагуу авч хэрэгжүүлсэн арга хэмжээгээ танилцуулсан юм.

Үүний дагуу ОУСХ-ноос  zarig.mn сайтын эрхлэгч, сэтгүүлч Н.Өнөрцэцэг болон Цензургүй багийн сэтгүүлч Ж.Баттуул, мөн Эрүүгийн хуулийн 13.14 заалтаар гэмт хэрэгт буруутгагдаад буй сэтгүүлчдийн талаар дэлгэрэнгүй мэдээлэл авахыг МСНЭ-ээс хүслээ.

Тодруулбал, ОУСХ-ны Ази номхон далайн бүс хариуцсан захирал Александр Олук өчигдөр /2023.12.06/ МСНЭ-д имэйл илгээсэн юм. Тус имэйлд “Танай хоёр сэтгүүлч албан тушаалтнуудын гэмт хэрэг, авлигатай тэмцсэнийхээ улмаас нэвтрүүлэг болон сайтаа хаалгасан, хилийн хориг /2023.12.29/ тавиулсан талаар мэдээлэл авлаа. Энэ талаарх бүрэн мэдээллийг МСНЭ-ийн өмнөөс ирүүлэхийг хүсч байна. Бид энэ хэргүүдийн талаар судлан, хамтран ажиллах болно” гэжээ.