Өчигдөр аймгийн Засаг дарга Р.Сэддорж, "Цахилгаан дамжуулах үндэсний сүлжээ" ТӨХК-ийн Говийн бүсийн салбарын төлөөлөгч нарыг хүлээн авч уулзсан. Тус уулзалтаар говийн бүсийн цахилгаан эрчим хүчний ачаалал, нөхцөл байдлыг танилцуулж, Даланзадгад сумын Шинэ суурьшлын бүсийн гаралтын тоноглолыг засварлах ажлын зардал, төсвийг шийдвэрлэх, цаашид авах арга хэмжээний талаар ярилцсан юм.

Өнөөдөр Аймгийн Онцгой Комисс хуралдаж уг засварын ажилд шаардлагатай 266 сая төгрөгийг шийдвэрлэж өглөө. Мөн "Өмнөд бүсийн цахилгаан түгээх сүлжээ" ТӨХК-ийн цаг үеийн байдалтай танилцаж, ачаалал ихэссэнтэй холбоотойгоор трансформаторууд гэмтэх, дамжуулах кабель шатах зэрэг доголдол үүсэж байгаатай холбогдуулан засвар үйлчилгээнд 119 сая төгрөг шаардлагатай байгаа тухай хэлэлцүүллээ. Цахилгаан эрчим хүчний найдвартай байдлыг хангах, ард иргэдийнхээ аюулгүй, эрсдэлгүй амьдрах боломж нөхцлийг хангах үүднээс, тус зардлыг АОК-оос шийдвэрлэх нь зүйтэй гэж комиссын гишүүд санал нэгтэйгээр дэмжлээ.

Цахилгаан эрчим хүчний асуудалд #Холбогдох төсөв хөрөнгийг ийнхүү аймгийн онцгой комисс шуурхай шийдвэрлэн ажиллаж байна.