Нийтийн тээврийн салбарт парк шинэчлэлт хийж, түгжрэлийг бууруулахаар үе шаттай ажиллах талаар нийслэлээс мэдэгдсэн. Тодруулбал, энэ онд шинээр 600 автобус авч, үйлчилгээнд гаргах юм. Тэгвэл бүх автобус хотод ирж, үйлчилгээнд гарсан талаар тодрууллаа.

600 шинэ автобус үйлчилгээнд бүрэн гарснаар чиглэлийн хөдөлгөөнд хүлээгдэл үүсэх нь багасч, хүмүүс автобусаар бухимдалгүй, чөлөөтэй зорчих боломж бүрдэнэ.

Гэвч өнөөдрийн нөхцөл байдалд автобус нэмж авсан нь төдийлөн үр дүнгүй байгааг иргэд шүүмжилж байна. Нийслэлээс өгч байгаа мэдээллээр, 600 шинэ автобус Улаанбаатарт бүгд ирсэн. Автобусны жолоочийн хүрэлцээ муу байгаагаас бүгд хөдөлгөөнд орохгүй байгаа гэв.

Нийтийн тээврийн салбар жолоочийн нөөц дутагдалтай байгаа тул дүүргүүдийн хөдөлмөр эрхлэлтийн албанд бүртгэлтэй В, С ангилалтай иргэдийг Зорчигч тээврийн нэгтгэлийн сургалтын төвд бүртгэн, мэргэшсэн жолоочийн сургалтад хамруулахаар бэлтгэл ажлыг хангаж эхэлсэн байна. Шинээр худалдан авсан автобусуудыг бүрэн үйлчилгээнд үйлчилгээнд гаргахын тулд эхлээд эзэнжүүлнэ. Дараагаар нь бүртгэлжүүлж, нийтийн тээврийн компаниудтай эргэн төлөлтөө тохирч, төлбөрийн картны систем суулгаж гаргах аж.

ЖОЛООЧИЙН ЦАЛИНГ 3,5 САЯ ТӨГРӨГ БОЛГОХ ШИЙДВЭР АЛБАЖААГҮЙ

Нийслэлийн дүүргүүдийн Хөдөлмөр эрхлэлтийн албанд бүртгэлтэй байгаа В, С ангилалтай иргэдийг хоёрдугаар сарын 5-наас бүртгэж, Зорчигч тээврийн нэгтгэлийн сургалтын төвд үнэ төлбөргүй суулгахаар болсон. Үүнтэй холбоотой зардлыг нийслэлийн Нийтийн тээврийн батлагдсан төсвөөс гаргах юм. Цалин 3,5 сая төгрөг болно. Хоёр ээлжээр өдөрт 8-9 цаг ажиллах аж.

Гэхдээ одоогоор автобусны жолоочийн цалинг 3,5 сая төгрөг болгох шийдвэр албажаагүй байна.

Цалинг НИТХ-аар төсвийн тодотгол орж, машин цагийн журамд өөрчлөлт оруулна. Тэгэхээр жолооч одоо байгаагаас гурав дахин их хэрэгтэй байгаа нь гол асуудал болохыг нийтийн тээврийн газраас мэдэгдэж байна.