Баянзүрх дүүргийн 147 дугаар сургуулийн есдүгээр ангийн сурагч ангидаа нулимс асгаруулагч хий цацсаны улмаас 60 гаруй хүүхэд, гурван том хүн хорджээ. Түүнчлэн хийнд хордсон 37 сурагчийг ЭХЭМҮТ-д хүргээд байгаа бол насанд хүрсэн гурван хүнийг Цэргийн төв эмнэлэгт хүргэжээ. Мөн Баянзүрх дүүргийн нэгдсэн эмнэлэгт найман хүүхэд,  МЯСЭ-д 19 хүүхдийг хүргэж, хордлого тайлах эмчилгээ хийж байгаа аж.

Энэ талаар ЭХЭМҮТ "Манайд 147 дугаар сургуулийн 30 гаруй хүүхэд нулимс асгаруулагчид хордсоны улмаас хүргэгдэн ирсэн. Эмч нар яаралтай түргэн тусламж үзүүлэн усанд оруулж, хордлого тайлах эмчилгээг эхлүүлээд байна. Одоогийн байдлаар хүүхдүүд хордсон байж болзошгүй эрхтэн системийг нь шинжилж, цаашдаа ямар эмчилгээ хийлгэх эсэхийг тогтооно. Хүүхдүүдийн биеийн байдлын тухайд зарим нь усанд ороод хөнгөн байгаа бол зарим нь унтаа байдалтай байна" гэлээ.