Тайвань улсад зохиогдсон өсвөрийн жүдо бөхийн Азийн аварга шалгаруулах тэмцээнд оролцсон тамирчид өнөөдөр эх орондоо ирлээ. Эл тэмцээнээс +100 кг-ын жинд хүч үзсэн манай улсын тамирчин У.Дүүрэнбаяр алт, -63 кг-д Б.Ганхайч мөнгө, 50кг-д Ц.Цогтбаяр, 55кг-д Б.Сумъяабазар, 66кг-д Г.Балсанлхүндэв, +81кг-д Э.Эрдэнэбилэг, 52кг-д Ц.Хулан нар хүрэл медаль хүртжээ. Тэмцээнд 23 орны 300 гаруй жүдоч барилджээ.
Мөн энэ үеэр залуучуудын аварга шалгаруулах олон улсын жүдо бөхийн тэмцээн болжээ. Энэ тэмцээнд манай улсаас өсвөрийн Азийн аварга шалгаруулах тэмцээнд оролцсон тамирчид татамид хүч үзсэнээс У.Дүүрэнбаяр мөнгөн медаль, -83 кг-д Э.Хандармаа хүрэл медаль хүртсэн амжилттайгаар эх орондоо ирлээ.
Медалиа ихэрлүүлсэн У.Дүүрэнбаярын сэтгэгдлийг нь сонслоо.
-Юуны өмнө баяр хүргэе?
-Баярлалаа.
-Тэмцээнийхээ тухай сэтгэгдлээ хуваалцаач. Аль улсын тамирчин хүчтэй өрсөлдөгч байв?
-Өсвөрийн Азийн аварга шалгаруулах тэмцээн маш чанартай боллоо. Өрсөлдөгчдийн хувьд Япон, Солонгосын тамирчид хүчтэй байна.
-Өмнө таарч байсан тамирчидтайгаа таарав уу?
-Алтан медалийн төлөө Японы тамирчинтай барилдсан. Түүнтэй өмнө таарч ялагдаж байв. Харин энэ удаад ялж алт авсандаа баяртай байна.
-Залуучуудын тэмцээнээс мөнгөн медаль хүртжээ?
-Тийм ээ. Медалиа ихэрлүүлсэндээ баяртай байна. Багш нартаа баярлалаа.