Боловсролын сайд П.Наранбаяр зөвлөх Д.Гантулга болон бусад холбогдох албаныхны хамт Багануур, Баянгол, Сонгинохайрхан, Хан-Уул, Чингэлтэй дүүрэг дэх орон нутгийн өмчийн цэцэрлэгийн эрхлэгч нартай уулзаж, сургуулийн өмнөх боловсролд баримталж буй бодлого, цаашдын төлөвлөлтөө танилцуулан, тугамдсан асуудал, санал хүсэлтийг нь сонсов.Энэ хичээлийн жилд нийслэлийн хэмжээнд төрийн болон хувийн өмчийн 659 цэцэрлэг үйл ажиллагаа явуулж байгаагаас дээрх таван дүүргийн 193 цэцэрлэгийн эрхлэгч нар өнөөдрийн уулзалтад оролцлоо.Цэцэрлэгийн хүүхдийн хоолны түүхий эдийн зардлыг нэмэгдүүлж байгаад эрхлэгч нар талархал илэрхийлж, шим тэжээлийг хангалттай болгоход анхаарах шаардлагатайг онцлов. Тэд нөхөн хангалтын зардал, цэцэрлэгийн багш нарын гүйцэтгэлийн үнэлгээний урамшуулал, цалин болон бусад хангамж, эцэг эх, асран хамгаалагчдын харилцаа хандлага зэрэг асуудлаар санал хүсэлт хэлж байлаа. Мөн багш бэлтгэж буй сургуулиудын сургалтын чанар, төгсөгчдийн мэдлэг чадварт анхаарч сайжруулах, ерөнхий боловсролын сургуулийн адил цэцэрлэгт сэтгэл зүйч ажиллах шаардлагатай байна гэв.Ярилцсан асуудлуудыг бодитоор шийдвэрлэж, үр дүн гаргахын тулд шаардлагатай арга хэмжээг авах бөгөөд цэцэрлэгийн багш нарын гүйцэтгэлийн үнэлгээний урамшууллын тогтолцоонд өөрчлөлт оруулахдаа тэдний төлөөллийг оролцуулж, саналыг нь авна гэдгийг Боловсролын сайдын зөвлөх Д.Гантулга хэллээ. Уулзалтын үеэр эрхлэгч нараас гарсан санал хүсэлтийг нэгтгэн хүлээн авч, асуудлуудыг эрэмбэлэн, үе шаттайгаар шийдвэрлэхээр ажиллана гэдгээ Боловсролын сайд П.Наранбаяр илэрхийлэв.