“Рио де Жанейро 2016″ олимпын наадамтай холбоотой хоёр ч чухал сонгууль боллоо. Амралтын өдрүүдэд Рио де Жанейро хотын орон нутгийн сонгууль болсон бөгөөд хотын дарга Эдуардо Паэс 64,6 хувийн саналаар илт давуу тэргүүлж, 2016 он дуустал хотыг удирдахаар болжээ. Тэрбээр Лондоны олимпын хаалтын ёслолын үеэр олимпын тугийг ОУОХ-ны Ерөнхийлөгч Жак Роггегоос гардаж авсан юм. Түүний хувьд олимпын наадмын өмнө хотын дэд бүтэц, цэнгэлдэхтэй холбогдсон олон асуудлыг шийдэх шаардлагатай байгаа билээ. Мөн өнгөрсөн долоо хоногт Бразилийн үндэсний олимпын хорооны сонгууль болж өнгөрлөө. Уг сонгуульд ҮОХ-ны Ерөнхийлөгч Карлос Нузман олонхийн санал авчээ. 70 настай Нузман тав дахь удаагаа улирч буй нь энэ аж. Цагтаа волейболчин байж, 1964 оны олимпод оролцож явсан тэрбээр мэргэжлийн хуульч юм.