Монгол Улсын Эрдмийн их сургууль нь Европын холбооны Erasmus+ Moneul төслийн хүрээнд “Европын дээд боловсрол: Өнөө ба ирээдүй” сэдэвт эрдэм шинжилгээний хурлыг 2025 оны 8 дугаар сарын 29-ний өдөр зохион байгууллаа.
Даяашлын өнөө үед европын төдийгүй дэлхийн их сургуулийн хөгжил, боловсролын байгууллагын тэгш хамралт, чанарын баталгаажуулалт, сургалтын технологи, арга зүй, төгсөгчдийн хөдөлмөр эрхлэлт зэрэг тулгамдаж буй олон асуудлуудыг тодорхойлж, тэдгээрийг шийдвэрлэх шинжлэх ухааны үндэслэл, арга замыг дэвшүүлсэнд хурлын ач холбогдол оршиж байна.
Тус эрдэм шинжилгээний хуралд Монгол, БНХАУ, Энэтхэг улсын нийт 20 гаруй эрдэмтэн судлаачид сонирхолтой илтгэл тавьж хурлын төгсгөлд Монголын дээд боловсролын чанар, хүртээмжийг сайжруулахад Европын туршлагыг нэвтрүүлэх, оюутан солилцооны шинэ боломж, сургалтын хөтөлбөрийн олон улсын жишгийг хэрэгжүүлэх талаар өргөн хүрээний санал солилцов.
