Соёл спорт аялал жуулчлалын сайд Ц.Оюунгэрэл Монголын үндэсний олимпийн хорооны дэд ерөнхийлөгч Ц.Дамдин, Монголын сагсан бөмбөгийн холбооны ерөнхий нарийн бичгийн дарга Б.Дашдорж, Монголын үндэсний сагсан бөмбөгийн холбооны ерөнхий нарийн бичгийн дарга С.Тулга нарыг хүлээн авч уулзан сагсан бөмбөгийн спортод  тулгамдаж байгаа асуудлын талаар ярилцлаа. Энэ үеэрээ удахгүй болох үндэсний дээд лиг болон супер лигийн тэмцээнүүдийг хэрхэн зохион байгуулах, шилдэг тамирчдыг сонгон шалгаруулах, шигшээ багийг хэдийд бүрдүүлэх тухай асуудлуудыг хэлэлцсэн юм.

Сайд Ц.Оюунгэрэл удахгүй Соёл спорт аялал жуулчлалын яамнаас санаачлан “Спортын төрийн бус байгууллагуудын тухай” хуулийг боловсруулан гаргахаар бэлтгэж байгаагаа танилцуулж, тэднээс дээрх хуулинд оруулах саналыг сонслоо.
Мөн эдгээр хоёр холбоод нь тус тусдаа лигийн тэмцээнүүдээ явуулахыг нь зөвшөөрч, лигийн аль аль тэмцээний нээлтийн ажиллагаанд сайд өөрийн биеэр оролцохоо мэдэгдэв. Лигийн тэмцээнүүдээс шалгарсан багуудын хооронд 2013 оны 5 дугаар сард ССАЖЯ-наас эрхлэн “Лигийн аваргуудын тэмцээн”-ийг сагсан бөмбөгийн төрлөөр тусгайлан явуулахаар болов.

Одоогийн хууль эрх зүйн хүрээнд сагсан бөмбөгийн хоёр холбоо ажиллаж, үйл ажиллагаагаа явуулах үндэстэй гэдгийг тэрээр мэдэгдсэн байна. Гэхдээ 2013 оны УИХ-ын хаврын чуулганаар ССАЖЯ-наас  санаачлан “Спортын төрийн бус байгууллагуудын тухай” хуулийн төслийг оруулан батлуулснаар цаашид нэг төрлийн спортын нэгээс дээш тооны холбоод хамтран  ажиллах эрх зүйн орчныг бүрдүүлэх боломж бий болох юм.