Ам.долларын ханш өнөөдөр валютын зах дээр 1710 төгрөгт хүрч, Монголын эдийн засгийг монгол төгрөгтэй нь ёстой л нэг нухчин дарж байна. Монгол төгрөгийн ам.доллартай харьцах ханшийг тогтвортой байлгах арга хэмжээг төв банкнаас авч байгаа гэх боловч дорвитой үнэд хүрэхгүй нь. Цаашид хэд хүрэхийг хэн ч хэлж мэдэхгүй. Гэхдээ Засгийн газрын тэргүүн Н.Алтанхуяг ам.долларын ханш бол түр зуурын л үзэгдэл. Монголын валютын зах зээлд ам.доллар, юань хоёр цагаан сар болон есдүгээр сард буюу хичээлийн шинэ жил эхлэх үед л нэмэгддэг юм. Энэ байдал хэдхэн хоног үргэлжилнэ гэж хэлсэн ч ноён ногооны ноёрхол хэвийн үргэлжилсээр байна.
Харин “ноён ногоон”-ы өсөлтөд бухимдсан иргэд өнөөдөр Төрийн ордон руу салаавч гаргаж бухимдлаа илэрхийллээ. Иргэд ч гэж дээ, өнгөрсөн дөрвөн жилд Сангийн дэд сайдаар ажиллаж байсан Ч.Ганхуяг, эмч Б.Болдсайхан тэргүүтэй МАН-ын гар хөл болсон нөхдүүд салаавч гаргасан нь тэр. Тэд Төрийн ордны баруун урд талаас ам.долларын ханшийг буулга хэмээн хашгирч салаавч гаргаж, үргэлжлүүлээд саарал ордны зүүн хаалганаас “Ерөнхий сайд Н.Алтанхуягаа долларын ханш буулга, УИХ-ын дарга З.Энхболд ажлаа хий” хэмээн хашгирч салаавчдав.
Ам.долларын ханш өсөх хэрээр иргэдийн амьжиргаанд тодорхой хэмжээгээр нөлөөлөх нь ойлгомжтой. Наад захын жишээ л бодоход, хоёр сарын өмнө найман сая төгрөгийн үнэтэй байсан япон машин өнөөдр 10 орчим сая төгрөг болчихоод байгаа. Энэ мэтээр бараа бүтээгдэхүүний ханш огцом биш юм аа гэхэд багахан хэмжээгээр савалж буй.

Гэхдээ энэ савалгааны өөдөөс салаавч гаргаад хазаарлачихдаг бол сайхан л байна. Үнэтэй бараа зарж байгаа худалдагчийн өөдөөс салаавч гаргаад л хямдхан авна гэсэн үг үү, Ч.Ганхуяг аа. Өндөр үнэтэй мэс засал хийлгэхийн тулд таны өөдөөс салаавч гаргаад л үнэгүй шахуу эмчлүүлэх боломжтой юу Б.Болдсайхан эмч ээ.
Та нарынхаар бол төрийн ордон руу салаавч гарахаар ам.долларын ханш, монгол төгрөг хоёрын ханшны зөрүү солигдох уу. Хэрэв тэгдэг бол хүн болгоныг салаавч гаргахыг уриалъя.
Нэг салаавч дутаад байвал би хоёр гараараа салаавч гаргаж туслъя. Бүр багадаад байвал хөлөөрөө салаавч гаргаж илбэ үзүүлэхэд ч бэлэнэ байна шүү, салаавч гаргагчид аа.