ОХУ-ын ерөнхийлөгч Владимир Путин бүрэн эрхийн хугацаагаа өнгөрсөн гуравдугаар сард болсон сонгуулиар дахин сунгасан. Түүний тангараг өргөх ёслол тавдугаар сарын 7-ны Мягмар гаригт болсон. Путин ажлаа хүлээж авсантай холбоотойгоор тус улсын засгийн газар огцорлоо. Холбогдох тушаалд ерөнхий сайд Михаил Мишустин гарын үсэг зуржээ.

Хуулийн дагуу ерөнхийлөгч Путин ойрын өдрүүдэд багтаан Төрийн Думд шинэ ерөнхий сайдын нэрийг дэвшүүлнэ. Төрийн Дум тавдугаар сарын 10-ны өдөр ерөнхий сайдад нэр дэвшигчийн тухай хэлэлцэх юм. Шинэ ерөнхий сайд томилогдох хүртэл өмнөх засгийн газар ажлаа үргэлжлүүлнэ. Төрийн Дум баталснаас хойш долоо хоногийн дотор шинэ ерөнхий сайд шинэ засгийн газрын бүтцийн талаарх саналаа ерөнхийлөгчид өргөн мэдүүлэх ёстой.

Дашрамд дурдахад, Михаил Мишустин тэргүүтэй засгийн газар дөрвөн жил ажиллажээ.