19.7 сая төгрөгийн орлоготойгоор бараг сүүл мушгиж байсан М.Зоригт гишүүн жилийн дараа л гэхэд тэргүүн эгнээнд бичигдэж чадлаа. Түүний хувьд “Бодь Интернэйшнл”-ийн охин компани болох “Голомт” банкны хувь нийлүүлэгчдийн нэг. Гэхдээ 2012 оноос эхлэн ТУЗ-ийн гишүүд хооронд үл ойлголцол гарч, түүнийгээ жилийн дараа шийдэж, хувь эзэмшигчдийн харьцаа өөрчлөгдсөн. Ингээд УИХ-ын гишүүн Л.Болдын орлого багасаж, М.Зоригт гишүүнийх өсч өөрчлөлт мэдрэгдэж эхэлсэн байгаа юм. Энэ нь М.Зоригт гишүүн “Голомт” банкны 25 сая гаруй хувьцааг бүрэн эзэмшиж чадсантай холбоотой. Үүнээс өөр түүнд хөрөнгө оруулсан компани, төсөл байхгүй гэж мэдүүлсэн болохоор түүний орлогын эх үүсвэр нь банк болон УИХ-ын гишүүний цалин нь болж байна. Тэрээр нэг тэрбум гаруй төгрөгийн хадгаламжаас гадна 50 сая төгрөгийн авлагатай. Гэхдээ түүний нийт хөрөнгийн 80 орчим хувь нь үл хөдлөх хөрөнгө.
