Реалити шоуны од Ким Кардашиан бие давхар болсон ч сэтгүүлүүдэд эрэл ихтэй хэвээрээ л байна. Тэрээр хамгийн сүүлд “Cosmopolitan” болон Францын  “L’Officiel Hommes” сэтгүүлд ярилцлага өгч, нүүрэнд нь зургаа авахуулсан байна. Тэрээр бие давхар болсон гэдгээ зарлахаас өмнө  “Cosmopolitan”-д зургаа авахуулсан бол “L’Officiel Hommes”-т Кэни Уэсттэй хамт авахуулсан нэлээд эротик өнгө аястай зургийг нь нийтэлжээ. Тэрээр өдөр ирэх тусам хэвлийд нь томорч байгаа хүүхдийнхээ ирээдүйг бодоод тун удахгүй гэр бүлийнхээ реалити шоуг орхино гэсэн мэдээлэл байгаа. Энэ талаар Кардашиан тайлбар хийхдээ “Хэзээ шоугаа орхихыг хэлж мэдэхгүй байна. Гэхдээ амьдрал дандаа хувьсч өөрчлөгдөж байдаг. Кэни надад хувийн амьдралынхаа үнэт зүйлсийг хэрхэн нууцлахыг зааж өгч байгаа”  гэж ярьжээ.