Залуучууд нийгэмдээ сайн сайхан бүхнийг эхлүүлэх зорилго, үйлсээрээ нэгдэн хүмүүнлэгийн ажлыг хамтдаа зохион байгуулжээ. VIP crown авто клубын залуучуудаас санаачилан МУЗН, МЗХ-ны “Залуучуудын хүмүүнлэгийн хороо” хамтран хүүхдийн асран хүмүүжүүлэх төвд хүмүүжиж байгаа хүүхдүүдтэй нэг өдрийг хамтдаа өнгөрүүлсэн байна. “Ирээдүйгээ аваръя, идэвхтэй оролцъё” уриан дор зохион байгуулсан “Мөрөөдлийн машин” хүмүүнлэгийн ажилд тэд хүүхэд асран хүмүүжүүлэх төвийн 80 гаруй хүүхэд, багш нарын хамтаар 20-иод машинаар хотоор аялж, хүүхдүүдийг мөрөөдлийнх нь ертөнцөөр нэг ч гэсэн өдөр аялуулжээ. Мөн түүнчлэн МУЗН-ээс эдгээр хүүхдүүдэд 2 сая гаруй төгрөгийн үнэ бүхий 100 гаруй дулаан хөнжилийг хандивлажээ. Хүмүүнлэгийн ажлыг өрнүүлсэн ах эгчтэйгээ хамтдаа нэг өдрийг өнгөрүүлж, тоглож наадсан хүүхдүүд цаашид улам илүү хичээн суралцахаа амлаж байлаа. МЗХ-ны “Залуучуудын хүмүүнлэгийн хороо” цаашид малчдад илгээх “Сэтгэлийн илгээмж”, хөдөлгөөнт хүн ам, залуучуудад ХДХВ/ДОХ-оос урьдчилан сэргийлэх талаар мэдлэг, ойлголт өгөх “Галт тэрэгний аян”, мөн хүмүүнлэгийн чиглэлээр ажилладаг хувь хүн, олон нийтийн үүсгэл санаачилгын бүлэг, клуб, хөдөлгөөн, байгууллагын нэгдсэн мэдээллийн сан үүсгэх зэрэг хүмүүнлэгийн олон ажлыг хийхээр төлөвлөөд байгаа юм байна.