Цагдаа, дотоодын цэргийн байгууллагын удирдах ажилтны сургалт, зөвлөлгөөн Цагдаагийн ерөнхий газарт өнөөдөр эхэллээ. Энэ сарын 29-нийг хүртэл үргэлжлэх эл сургалт, зөвлөлгөөнд нийслэлийн болон хөдөө, орон нутгийн цагдаа, дотоодын цэргийн байгууллагын 92 удирдах ажилтан оролцож байна.
Тэд Монгол Улсын эдийн засгийн өнөөгийн байдал, цаашдын хандлага, менежментийн шинэ сэтгэлгээ, авлигын эсрэг үйл ажиллагаа, удирдахуйн ухаан сэдвээр номын дуу сонсч, цагдаагийн алба хаагчийн сахилга, ёс зүй, төрийн байгууллагуудын хамтын ажиллагаа, гэмт хэрэгтэй тэмцэх, нийгмийн хэв журам хамгаалах чиглэлээр зөвлөлдөх юм. Удирдах ажилтнууд маргааш Үндэсний аюулгүй байдлын зөвлөлийн ажлын алба, Улсын Дээд шүүх, Улсын ерөнхий прокурор болон төрийн тусгай чиг үүрэг бүхий байгууллагуудын удирдлагатай уулзана. Мөн удирдах ажилтнууд цагдаагийн алба хаагчийн бие бялдар, тусгай бэлтгэлийн нормативын шалгалт өгч, спорт, урлагийн тэмцээн уралдаан зохион байгуулах юм байна.