Монгол Улсын Ерөнхий сайд Н.Алтанхуягийг дагалдан Бурхан Халдун ууланд авирч төөрөөд нисдэг тэрэг болон олон машин техник, ажилтнуудаар эрүүлж улсаас өчнөөн зардал гаргуулсан гэгдээд байгаа хүмүүс энэ зардлаа эргүүлэн төлжээ.

Ууланд нийт 71 хүн төөрсний 13 нь Онцгой байдал, Төрийн тусгай хамгаалалтын ажилтан байсан болохоор тэднийг хасаад 58 хүн тус бүр 250 мянган төгрөг гаргаж нийт 14 сая 445 мянган төгрөгийг өнөөдөр Улсын Онцгой комиссын Нөөц хөрөнгийн дансанд хийлээ гэж энэ бүрэлдэхүүнд явсан “MIIS” компаний захирал М.Идэрбат өнөөдөр сэтгүүлчдэд мэдээллээ. 58 хүнээс нэг нь ч мөнгөө өгөлгүй унжаагүй гэдгийг М.Идэрбат захирал бас тэмдэглэсэн юм.


Төөрсөн хүмүүсийг олсон өдрийн өглөө л манай ASSA.mn сайт “Алтанхуягийн аяллын баг аврагдсан  зардлаа эргүүлж төлөөсэй” хэмээн бичсэн. Энэ нийтлэлийг уншсан хүмүүсээс 93 нь сэтгэгдэл бичсэний ихэнх нь зардлаа эргүүлж төлөх нь зөв гэсэн байсан юм. Хэвлэл мэдээллийн бусад хэрэгслүүд ч үүнийг дэмжин өөр өөрийн зүгээс сурвалжлан бичиж байлаа.

Энэ бүхнийг мэдэрч ойлгосон дээрх нөхөд ийнхүү улсаас гарсан зардлыг эргүүлэн төлсөн нь нэгд хэвлэлийн мэдээлэл, хүмүүсийн уур амьсгал, сэтгэгдлийг холбогдох хүмүүс нь уншиж хүлээн авдаг, нөгөө талаар буруу үйлдэл хийсэн бол түүнийгээ хүлээж алдаагаа засдаг шинэ жишиг тогтохын эхлэл боллоо гэж үзэж болох нь ээ.