Цагийн ажил хийж орлоготой болж ойр зуурын хэрэглээний мөнгөө олох сонирхолтой оюутнууд олон байдаг ч тэднийг цагийн ажилд зуучлах бирж манай улсад байдаггүй. Тэгвэл оюутан залуучуудыг аж ахуйн нэгж болон хувь хүмүүсийн захиалгын дагуу ажлын байраар хангах боломжийг бүрдүүлэх, мөн гадаадад сурч, ажил хөдөлмөр эрхлэж байгаа иргэдэд Монгол дах ажлын байрны мэдээллээр хангах, зуучлах, мэдээллийн нэгдсэн сан бий болгож вэб хуудас тогтмол ажиллуулах “Цагийн ажил” төслийг МЗХ, Хөдөлмөрийн яамтай хамтран хэрэгжүүлж эхлээд байгаа юм. Энэхүү хөтөлбөрийг МЗХ-ны дэргэдэх Залуучуудын Хөдөлмөрийн Төв Бирж хариуцан ажиллах бөгөөд “Ажилтай, орлоготой Монгол залуу” хөтөлбөрийн хүрээнд хэрэгжүүлж байгаа “Цагийн ажил” төсөлд оюутан залуучууд хамрагдсанаар ажлын байрны дадлага туршлага хуримтлуулах, оюутнууд дадлага хийх байгууллагаа олох, их дээд сургууль төгсөгч оюутан залуучуудад ажлын байрны мэдээллээр хангах, нөгөө талаас байгууллагуудад хүний нөөцийн асуудлыг шийдвэрлэхэд нэг гарц болно гэдгийг хөтөлбөрийг боловсруулагчид хэлж байгаа юм. Оюутнуудыг цагийн ажилд авах байгууллагуудын санал аль хэдийнэ энэхүү биржэд ирсэн байгаа бөгөөд цагийн ажилд зуучлах бүртгэл эхэлсэн нь энэ ажил ямар эрэлттэй байсныг илэрхийлж байна. Цагийн ажил төсөлд бүртгүүлэх оюутан залуус МЗХ-ны төв байр 201 тоотод ирж бүртгүүлэх бөгөөд дэлгэрэнгүй мэдээллийг 321814 дугаарын утсаар холбогдож авах юм байна.