Хятадын Хэнань мужийн Юнчен нэртэй хотын Коммунист намын хорооны удирдах газрын орлогч дарга Лин Синьгун гэгчийг цаазаар авсан байна. Түүнийг жил гаруй өмнө насанд хүрээгүйчүүдийн эсрэг бэлгийн гэмт хэрэг хийсэн гэж сэжиглэн баривчлаад байсан юм. Мөрдөн байцаалтын явцад албан тушаалтан нь 2011 оны дунд үеэс эхлээд 11 охиныг хүчирхийлсэн болохыг хөдлөшгүй баримтаар тогтоосон байна.
Хэрэгтэн ч өөрөө бүх гэмээ хүлээжээ. Үүнээс үүдээд Хятадын анхны шатны шүүх түүнд цаазаар авах ял оноосон ч хэрэгтэн удаа дараалан давж заалдсан ч дээд шүүхээс ялыг хэвээр үлдээсний дараа өнгөрөгч мягмар гарагт ялыг гүйцэтгэжээ.
Сүүлийн жилүүдэд Хятадын Коммунист намын гишүүн, албан тушаалтнуудын дунд эрх мэдлээ хэтрүүлэн ашиглах, авлигын хэрэгт орооцолдох нь огцом нэмэгдэж жирийн иргэдийн уур хилэнг ихээр төрүүлэх болсон. Ийм нөхцөлд Хятадын эрх баригчид нэг талаар намын нэр хүндийг сэргээх, нөгөө талаар иргэдийн бухимдлыг намжаахын тулд ёс суртахуунгүй гишүүдийнхээ эсрэг хайр найргүй дайн зарлаад байгаа. Энэ дайны хүрээнд байсхийгээд л нэг дуулиант хэргийн эзэн илэрч гол төлөв цаазаар авахуулдаг.