Хойд Солонгосын эрх ба­ригчид тусгайлан Өмнөд Солонгосын сайтууд дээр Сөүлийн явуулж байгаа бод­логыг шүүмжилсэн, эсэргүүцсэн сэтгэгдэл үл­дээдэг хоёр зуу гаруй хүнээс бүрдсэн тусгай бүлэг байгуулжээ. Мөн Өм­нөд Солонгосын эсрэг кибер дайн явуулахад шаардлагатай гэж үзээд интернэт, прог­рамм хангамжийн 3000 мэр­гэжил­тэн, өөрөөр хэлбэл хакерыг нэмж дайчилсан байна. Энэ тухай Өмнөд Солонгосын “Чосон ильбо” сонин мэдээлэв.

Санаатайгаар бусдыг уур­луулж бухимдуулсан, хэрүүл өдсөн сэтгэгдэл үлдээн өөрийн үзэл бодлоо бусдад тулгах, хэрэглэгчдийн анхаарлыг тат­даг хүмүүсийг интернэт орчинд “тролль” гэж нэрлэдэг. Хойд Солон­го­сын “тролль”-ууд нь Өмнөд Солон­го­сын сайтаас хулгайлсан хувийн мэдээллийг ашиглан сэтгэгдлээ үлдээж ухуулга хийх аж. Харин гурван мянган хакер нь Өмнөд Солонгосын интернэт мэр­гэжилтнүүдийг хойдуудад ээлтэй сай­туудыг хаахаас сэргийлэх, ийм сайтын хандалтыг огцом нэмэгдүүлэх тал дээр эрчимтэй ажиллах юм байна.

Хойдууд нь өөрийн үзэл бодлыг олон нийтэд сурталчлах зорилгоор 19 оронд байрласан сервер дээрх 140 сайтыг идэвхтэй ашигладаг болохыг судлаачид тогтоожээ. Тэдний интернэт идэвхжилт ирэх тусам нэмэгдсээр. Ту­хайлбал, 2011 онд хакерууд Өмнө­дийн эсрэг агуулгатай, өөрийн үзэл бодлыг сур­талчилсан 27 мянган мэдээл­лийг интернэт сайтаар тараасан бол 2012 онд 41 мянга гаруй ухуулга суртал­чилгааны нийтлэл тараажээ. Энэ тоо цаашид улам нэмэгдэх нь гарцаагүй.

Эдгээр кибер дайчдын үйл ажиллагааг Нэгдсэн фронтын ухуу­лга сурталчилгааны хэл­­­­­­тэс, Жанжин штабын таг­нуулын удирдах газар гэсэн хоёр байгууллага удирдан чиг­лүүлдэг аж. Гэхдээ одоо­гоор мэдэгдэж буй 3200 хүн нь дөнгөж өнгөн хэсэг гэдгийг өмнөд солонгос судлаачид онцолж байгаа юм. Өм­нөд Солонгост интернэт ор­­чинд өрсөлдөх, кибер дайн явуулах, интернэтээр дам­жуу­лан чучхегийн онолыг сур­талчлахад нийтдээ 30 мян­га гаруй мэргэжилтэн ажил­ладаг, жил болгон энэ чиг­лэлээр ажиллах гурван зуун мэр­гэ­жилтэн бэлтгэж гаргадаг гэнэ. 30 мянган хүн гэдэг армийн хэмжээнд очсон гэсэн үг.

Хакер, программчид, “тролль”-иудаас бүрдсэн бү­хэл бүтэн арми бэлдэнэ гэ­дэг Хойд Солонгосын эрх баригчид энэ салбарт ямар их ач холбогдол өгч, анхаардгийг харуулж буй юм. Үр дүнд нь интернэтэд хоёр солонгосын сөргөлдөөн газар авах болсон. Жишээлэхэд, энэ оны дөрөвдүгээр сард Сөүл нь банк, ТВ сувгууд руу хакерын дайралт хийж үйл ажиллагааг нь саатуулах, мэдээлэл хулгайлахыг завдсан гэж Пеньяныг албан ёсоор буруутгасан. Үүнээс яг сарын өмнө америкчуудыг өөрсдийнх нь сайт, серверийг хакердсан гэж Хойд Солонгос мэдэгдэж байлаа.

Компьютерийн технологи, интернэтийн ач холбогдол асар хурдтайгаар цаг минутаар шахуу нэмэгдэж байгаа энэ үед кибер аюулгүй байдалдаа онцгой анхаарал тавихаас өөр аргагүй болоод байна. Ялангуяа, Америкийн Тагнуулын төв газрын экс ажилтан Эдвард Сноуденийн хийсэн олон тооны мэдэгдэл нь интернэт аюулгүй байдлын асуудалд дэлхийн нийтийн анхаарлыг чиглүүлсэн. Сноу­де­ний мэдэгдсэнээр Америкийн тусгай албад нь дэлхийн хэмжээнд сая сая хүний утас ба бүх интернэт холболтыг нэлээд хэдэн жилийн турш нууцаар бүртгэн чагнадаг байжээ. Гэхдээ зөвхөн Америкийн тусгай албадууд ингэж чагнадаггүй болох нь Сноудений дуулианы дараа ил болов. Тухайлбал, Францын тусгай албад ч америкчуудтай адил өөрийн болон гадаадын интернэт хэрэглэгчдийн холболтыг хянадаг, утасны бүх холболт, мессеж зэргийг бүртгэдэг байсан тухай энэ улсын хэвлэл мэдээллийн хэрэгслүүд мэдээлсэн. Ингээд ч зогсохгүй Их Британи, Дани, Нидерланд, Герман, Испани, Итали зэрэг улсын тусгай албад яг адил үйл ажиллагааг нууцаар явуулдаг төдийгүй нууц мэдээллээ хоорондоо идэвхтэй солилцдог, шаардлагатай үед хэрэгтэй хүний утас, интернэт холболтыг өөрийн улсаас хянадаг байсан тухай Америкийн Үндэсний аюулгүй байдлын албаны офицер асан Мэдсон гэгч илчилсэн нь кибер аюулгүй байдлын асуудлыг бүр ээдрээтэй болгосон нь мэдээж.

Өрнөд Европын өндөр хөгжилтэй орнууд, АНУ-д ин­тернэт болон гар утас­ны холболтыг нууцаар бүрт­гэх, чагнах ажиллагааг хэрэг­жүү­лээд эхэлчихсэн, Хойд Солон­гос хакерын арми байгуулж байгаа юм чинь Орос, Хятад хоёрт энэ чиглэлээр үйл ажил­лагаа явуулдаг нууц хөтөлбөр бай­гаа гэдэгт мөрийцсэн ч болно. Тэгээд ч Хятадын Ар­дын чөлөөлөх армид интернэт тагнуулын үйл ажиллагаа явуулдаг тусгай анги байдаг тухай Америкийн хэвлэл мэдээллийн хэрэгслүүд мэ­дээлж нэлээд дуулиан тариад авсныг уншигч та лав санаж байгаа байх.

Өнөөдөр хүн гар утас, ин­тер­нэт ашиглан алсаас гэр­тээ буй кофе асаагчаа ажил­луу­лахаас эхлээд хүүхдээ хаана явааг нь хянах, дурын бүтээгдэхүүнээ захиалан худал­даж авах, захидал солилцох, татвар төлөх, сонгуульд санал өгөх, лавлагаа авах, мөнгөн гүйлгээ хийх, өвчин эмгэгээ оношлуулах, эмчилгээ бичүүлэх, байнгын хяналтанд орох  гээд бүх л зүйлээ хийж болж байна. Интернэт технологи цаашид хөгжихийн хэрээр боломж улам л нэмэгдэхийг дагаад интернэт ашиглан хүний хувийн нууцад нэвтрэх, нууц мэдээлэл олж аван хүнд хор хүргэх зорилгоор ашиглах боломж ч нэмэгдэнэ. Өчигдөрхөн Америкийн нэгэн айлын электрон асрагч руу Европоос хакердаад хүүхдийн нэрийг олж мэдэн элдэв хараалын үг зааж байсан нь илэрсэн гэхээр интернэт аюулгүй байдал улс гүрний төдийгүй нэг айлд ч ямар чухал болохыг харуулж байгаа юм . Электрон асрагч нь дуу, дүрс дамжуулдаг камер бүхий төхөөрөмж бөгөөд өрөөнд буй хүүхдийг ямар байгааг алсаас хянах,  ярьж аргадах, холбогдох боломж олгодог.

Өдгөө Орост цагаачийн эрх аваад байгаа экс тагнуулч Сноуден энэ талаар ярихдаа “Хүний электрон шуудангийн хайрцагны хаягийг л мэдсэн бол би ажлын байрандаа компьютерийн ард сууж байгаад жирийн хүнээс эхлээд Ерөнхийлөгч хүртэл дурын хүний захидлыг уншиж чадна” гэсэн байна. Ерөнхийлөгч, Ерөнхий сайд гэх мэт төрийн өндөр­лөгүүдэд зориулсан маш нууц мэдээллийг ингээд хэ­дэн мянган км-ийн алсад компьютерийн ард суугаа хэн нэгэн хакерт алдана гэдэг ямар ч улсын аюулгүй байдлыг ноцтой эрсдэлд оруулж байгаа хэрэг.
Иймд цаашдаа улс орнууд кибер аюулгүй байдлыг хангахад улам их мөнгө хөрөнгө зарцуулдаг болох нь гарцаагүй. Бид ч энэ талаар дэлхийн нийтийн чиг хандлагаас хоцрохгүй байвал сайнсан.