Орон сууцны үнэ тэнгэрт хадав. Хотын захад шинээр ашиглалтад орж буй байрны нэг өрөө 60-70 сая төгрөгт хүрчээ. Ингэж өндөр үнэтэй дуугарч байгаа шалтгаанаа компанийн удирдлагууд барил­гын материа­лын үнэ нэ­мэгдсэнтэй, мөн ам.долла­рын ханш чангар­сантай холбон тайлбарладаг. Гэхдээ тэд нэг л зүйлийг мартаад байх шиг. Барилга баригдаж байх үед барилгын материал өнөөдрийнх шиг өндөр үнэтэй, ам.доллар ч одоотой адил байсангүй. Байрны үнэ нэмэгдэх болсон бодит шалтгааныг эрж хайвал Засгийн газраас хэрэгжүүлж буй ипотекийн зээл буюу алдарт “найман хувийн хүү­тэй зээл удахгүй зогсоно” гэсэн цуу олон нийтийн дунд хүчээ авсантай холбоотой гэж учир мэдэх хүмүүс ярих юм. Төсвийн орлого тасалдаж, Чингис бондын үнэ цэнэ буурсан зэрэгтэй холбоотойгоор санхүү­жилт дуусч байгаа учир уг хөтөлбөрийг удахгүй зогсооно гэсэн яриа яагаад ч юм их газар авчээ. Магадгүй, өмнөх Засгийн газрын үед хэрэгжүүлж байсан моргэйжийн зээлийн хөтөлбөр бүтэлгүйтсэн нь үүнд том нөлөө үзүүлсэн биз. Тийм ч учраас иргэд хөтөлбөр дуусахаас өмнө амжиж зээлд хамрагдахыг ихэд эрмэлзэх болжээ.
Арилжааны банкуудын эдийн засагчдын хэлж буйгаар өдөрт 20-30 хүн ирж зээлийн талаар зөвлөгөө, мэдээлэл авах болж.

Харин энэ байдлыг компаниуд овжин ашиглаж байрны үнээ тултал өсгөсөн бололтой. Залуу гэр бүлийг дэмжиж, хямд орон сууцаар хангах зорилгоор барьсан “Залуус хороолол”-ыг уншигч та мэдэх биз. Саяхан л барьцаа хөрөнгөгүй 1,2 хувийн хүүтэй зээлд хамрагдан байртай болохыг санал болгож байсан. Тухайн үед ам.метр талбайн үнэ 1000 ам.доллар байсан бол өнөөдөр 2000 болгон нэмсэн гэж дууллаа. Зарын нэгэн цахим хуудаснаа “Вива хот” дахь байраа ам.метрийг нь хоёр сая төгрөгөөр зарна гэснийг олж үзвээс энэ нь үнэн бололтой. Анх орон сууцны захиалга авч байх үед ам.долларын ханш 1200 төгрөгөөс нэг их даваагүй байлаа. Харин өнөөдөр 1585 төгрөг болж өсч. Залуу гэр бүлийн хямд орон сууцтай болох мөрөөдөл ийнхүү замхрав. Ингээд бодохоор орон сууцны үнэ зүгээр л эрэлт, нийлүүлтэд тогтож байна. Ямар нэгэн эдийн засгийн давагдашгүй хүчин зүйлээс бус. Тэр бүү хэл төв банкнаас байрны үнийг тогтвортой байлгах зорилгоор барилгын материалын үнийг бууруулж, төсөл хөтөлбөр хэрэгжүүлсээр байгаа. Барилгын компаниудыг төрөөс дэмжсэн ч үнээ бууруулах ёс зүй тэдэнд  алга. Харин ч шалтаг олдвол хошуу унжуулан тусламж эрдэг муухай зан суучихаж.

Орон сууцны үнэ гурван сарын хугацаанд дунджаар ам.метр нь 300 мянган төгрөгөөр нэмэгдээд байна. Өнөөдөр тодорхой хэмжээний мөнгөн хуримтлалтай иргэдийн хувьд байранд орох гэж зүтгэхээс илүү амины орон сууцтай болох нь хямд бөгөөд амар болж байх шиг. Барилгын материал, ажлын хөлс нь газрын үнэтэйгээ нийлээд нэг өрөө байрны үнэ хүрэхгүй мөнгөөр таван өрөө байшинтай ч болж болно. Ядаж л өрөнд орохгүй. Хэрвээ үнэхээр байртай болохыг хүсч байгаа бол орон сууцны зээлийн хөтөлбөр зогсохгүй гэдгийг хөтөлбөрийн мэргэжилтнүүд, Засгийн газар амлаж байгааг дахин сануулъя. Түүнээс гадна ашиглалтад орж байгаа орон сууц хангалттай бий учир цаашдаа байрны үнэ буурна хэмээн мэргэжилтнүүд хэлж байна. Тухайлбал 2013-2014 онд л гэхэд 33 мянган орон сууц ашиглалтад орно. Мөн гэр хорооллыг барилгажуулах төслийн хүрээнд хэд, хэдэн орон сууцны хороолол баригдаж байгаа аж. Тиймээс иргэд тэвчээртэй байвал илүү хожоотой байж ч мэдэх юм шүү.