Хилчдэд Дорноговь аймгийн Замын-Үүд суман дахь төмөр замын ажилтнууд улсын хилээр их хэмжээний валют, эд зүйл хууль бусаар нэвтрүүлж буй талаар мэдээлэл иржээ. Энэ мэдээллийн дагуу наймдугаар сарын 22-ны өдрийн 21.40 цагт Замын АЗШНБ-оор 06-15ДГА улсын дугаартай Старекс маркийн автомашинаар зорчиж явсан төмөр замын ажилтан А нарын авч явсан ачаа, эд зүйлд үзлэг хийхэд БНХАУ-ын талаас их хэмжээний юань, монгол төгрөг оруулж ирснийг илрүүллээ. Улсын хилээр хууль бусаар их хэмжээний валют оруулж ирэх явдал нь Монгол Улсад төгрөгийн ханш унагах, хуурамч валют эргэлтэнд орох зэрэг эрсдэлтэйгээс гадна гэмт бүлэглэлүүдийн хил дамнасан мөнгө угаах үйлдэл байж болзошгүй бөгөөд Монгол Улсын эдийн засгийн аюулгүй байдалд сөргөөр нөлөөлдөг байна. Харин энэ удаагийн тус зөрчлийг Монгол Улсын дархан хилийн амгалан байдлын төлөө ажиллаж буй хилчид цаг алдалгүй илрүүлж үүргээ нэр төртэйгээр гүйцэтгэлээ.