Өөрөөсөө том цүнх үүрэн сурагчийн дүрэмт хувцсаар “гоёсон” багачуул ээж, аавдаа хөтлүүлэн эрдмийн өргөө рүүгээ явж буй нь хичээлийн шинэ жилийн хамгийн сайхан дүр зураг. Багшдаа өгөх цэцгээ барьсан жаал, зуны гурван сар ангийнхаа андыг санасан охин, битүүхэндээ дотроо хайрлах Чимгээ нь хэр өөрчлөгдсөнийг харах гэж яаран алхах оюутан залуугийн сэтгэл сургууль руугаа тэмүүлнэ. Хэн бүхэнд сайхан дурсамжийг нь санагдуулах хичээлийн шинэ жилийн баяр бусдын буруугаас болж бяцхан үрээ алдсан эцэг, эхчүүдийн сэтгэлийн утсыг хөндөх нь яалтай ч билээ.

Энэ өдрийн баярыг нь хуваалцан багш, найз нөхдийнхөө тухай хуучлан ярих хүү, охиныхоо дуу хоолойг сонсч, үсийг нь илбэн үнсэх хувь дутсандаа харуусах хэчнээн эцэг, эхийн нүдэнд нулимсан хөшиг татаж байгаа бол ...
Уншигч та хичээлийн шинэ жил эхэлсэн энэ баярт өдөр юун гуниг харууслыг өгүүлнэ вэ гэж зэмлэх байх. Гэвч эцэг, эхдээ энэ баярын өдрийн жаргалыг мэдрүүлэн хайранд нь эрхлэн өсөх ёстой үр нь бусдын буруугаас хөрст алдан дэлхийдээ нойрсож буй олон мянган хүүхдийн эмгэнэлтэй хувь заяаг хөндөх ёстой гэж бодлоо. Хүүхэд гэдэг энэ хорвоогийн баяр, жаргал гэж ярьдаг. Гэхдээ бид чинь хүүхдийнхээ тоглож, наадах, сурч боловсрох орчных нь талаар хэр анхаардаг билээ дээ. Томчуудын аминчхан, ар­чаагүй байдлаас болж олон хүүхэд эцэг, эхдээ амь­дын хагацлыг үзүүлэн энэ ертөн­цөөс үдлээд буцсаныг Хүүх­­­дийн төлөө үндэсний төвөөс гаргасан судалгаа харуулна.

Тоо гэдэг үнэндээ хэр олон бэ гэдгийг харуулахаас биш хүүхдийнхээ сайн  сайхныг үзэх хувь дутсандаа дотогшоо мэгшин уйлах ээж, аавын энэлэн шаналалын хувь хэмжээг өгүүлэхгүй. Угтаа, тоо гэдэг баримт учраас тэр. Тиймээс ч бичихийг чухалчилсангүй. Гагцхүү амьдралын тань баяр баясал, утга учир болсон үр хүүхдийнхээ тоглож, наадах, амьд явах эрхийнх нь төлөө шударга ёсыг нэхэж, хуулиа дээдлэн мөрдөхийг эрх баригчдаас нэхье.

Өнгөрсөн жил хичээлээсээ тараад гэртээ харих гэж яваад амиа алдсан Есүгэн охин, найзуудтайгаа уулзахаар явж байсан оюутан залуугийн эмгэнэлтэй хувь заяагаар жишээ авъя. Жил гаруйн хугацаа өнгөрөхөд олонд мэдэгдсэн эл хэргийн буруутан өнөөг хүртэл тодроогүй, хүүхдийнхээ алтан амийг эцэг, эх нь хэнээс нэхэхээ үл мэднэ. Нийтэд мэдэгдсэн нь энэ болохоос бусдын нүднээс далд хэчнээн хүүхдийн амь нас хохирч буйг бид ч бас үл мэднэ. Уг нь, Монгол Улсад хүчин төгөлдөр мөрдөгдөж буй эцэг хууль гэгдэх Монгол Улсын Үндсэн хуульд хүн амьд явах эрхтэй гэж заасан. Гэвч бид амьдралын амтыг дөнгөж мэдэрч буй үр хүүхдээ бусдын болчимгүй үйлдэл, хууран мэхлэлт, шударга бус байдлаас хамгаалж чадалгүй диваажин руу нулимстай үдэж буй нь бодит үнэн.

Миний хүүхдэд л тохиолдоогүй бол яамай гэж та бүү бод. Өвчин хэлж биш хийсч ирдэг гэсэн үг бий. Гай тотгороос тойрч гардаг хүн гэж байхгүй. Миний, таны ч хүүхэд бидний амьдралын утга учир. Монгол Улсын хөгжлийн түлхүүр. Эх орны баялаг болсон үр хүүхдээ бид хууль дүрмээ уландаа гишгэж, шударга ёсыг дэвсэлсэн бүтээн байгуулалт нэрээр халхавчлан зөвшөөрөлгүй байшин барилга барьж буй нөхөд, хууль, дүрэм зөрчигчид, алба­ны ажлыг залгуулж буй нэр­тэй төрийн механизмыг завх­руулагчдаас хамгаалъя. Бидэнд тийм эрх нь бийг ч Монгол Улсын Ерөнхийлөгч Ц.Элбэгдоржийн хичээлийн шинэ жилийн нээлтэд зориул­сан “Хуулийн засаглал-хүүх­дийн оролцоо” теле хичээлээс сонсоорой.  Хууль гэдэг хэн нэгэн этгээдэд бус бүгдэд нь хамаатай, тэгэхдээ бүр эрх тэгш үйлчилдэг гэдгийг тэрээр амьдралаас урган гарсан жишээ, баримтаар тайлбарлан хэлснийг сана. Ийм баярт өдөр ийнхүү өгүүлэх нь бусдын буруугаас болж гараасаа хөтлөх хүүхдээ алдсан ээж, аавын амьдын хагацлыг өөр нэгэн эцэг, эхэд мэдрүүлэхгүй л гэснийх. Хэрвээ Монгол Улсад хууль хэрэгждэг, шударга ёс бө­хөөгүй бол хичээлийн шинэ жилийн баяраа ээж, аавтайгаа хуваалцах байсан Есүгэн охин, хи­чээлээ тараад найзтайгаа уул­зах байсан оюутан залуу­гийн төлөө үгээ хэлье. Хууль бүх хүнд тэгш үйлчилдэг юм бол хариуцлагагүй байдлаас болж бусдын аминд хүрсэн албан тушаалтанд ч хариуцлага тооцъё.