Ардчилсан намаас сар бүрийн эхний долоо хоногийн пүрэв гарагт зохион байгуулдаг 4:11 ээлжит уулзалт өчигдөр боллоо. Уулзалтад тус намын ерөнхий нарийн бичгийн дарга Ц.Оюундарь, нарийн бичгийн дарга, Улстөрийн бодлогын хэлтсийн дарга Д.Анхбаяр, Олон нийттэй харилцах хэлтсийн дарга О.Чулуунбилэг нар оролцож мэдээлэл өгөхийн зэрэгцээ сэтгүүлчдийн сонирхсон асуултад хариуллаа. АН УИХ-ын сонгуулиар ард иргэддээ амласан амлалтаа хэрэгжүүлэх зорилгоор гурван чиглэлээр ажиллахаар болж буй аж. Гадаад харилцаагаа өргөжүүлэх, намын анхан болон дунд шатны төлөвшилтөд анхаарч ажиллахын сацуу Засгийн газрыг ард түмэндээ амласан мөрийн хөтөлбөрөө хэрэгжүүлж ажиллахад ан­хаарч, өнгөрсөн нэг жи­лийн хугацаанд мөрийн хөтөл­бө­рүүдээс хэрэгжсэн, хэ­рэг­­­жээгүйд нь хяналт тавих гэнэ. АН-ын генсек Ц.Оюундарь тэргүүтэй тус намын төлөөлөл өнгөрсөн сарын 21-27-нд БНХАУ-ын Коммунист намын урилгаар тус улсад ажлын айлч­лал хийгээд иржээ. Энэ талаар Ц.Оюундарь “Улс орны эдийн засаг хөгжлийн гол зүйл нь гадаад нээлттэй бодлого байдаг. Тэд эдийн засгийг ардчилах ёстой гэдэг бодлого барьсан байна. Эдийн засаг ардчилагдаад ирэхээр гадаадын хөрөнгө оруулалтууд чө­лөөтэй орж ирдэг. Ингэснээр ши­нэ ажлын байр бий болно гэдэг бод­логоор ажилладаг юм байна” гэв.
Энэхүү мэдээллийн дараа түүнээс цөөн асуултад хариулт авлаа.

-Эдийн засагт үүсээд байгаа нөхцөл байдлыг гадаадын хө­рөнгө оруулалт буурсантай хол­бон тайл­барлаж байгаа. Хөрөн­гө оруулалтыг хэрхэн сэргээх вэ. Энэ талаар танай нам ямар бодлого барин ажиллаж байна вэ?
-Оюу толгой өнгөрсөн жилүүдэд Монголын эдийн засагт бодит хөрөнгө оруулалт оруулж байсан. Гэвч тодорхой хүндрэлүүдийн ул­маас өмнөх оруулж байсан хөрөнгө оруулалттай одоогийн байд­лыг харьцуулахад буураад байгаа. Нөгөөтэйгүүр ашигт малтмалын 1500 лицензийг цуцалсантай холбоотойгоор түүгээр дамжиж орж ирж байсан хөрөнгө оруулалт цуцлагдсан. АН сонгуулийн мөрийн хөтөлбөртөө замбараагүй олгосон ашигт малтмалын лицензүүдийг цэгц­лэхээ амласан. Одоо ашигт малтмалын лицензүүдийг Хө­рөнгө оруулалтын тухай хуулиар зохицуулж, хуулийн дагуу олгоод эхлэхээр хөрөнгө оруулалт зах зээлийнхээ жамаар өсөөд явах учиртай.

-МАН-ын Шинэчлэлийн хороо­ны залуус Засгийн газрыг тэр дундаа Ерөнхий сайдыг сайн дураараа огцрох ёстой гэх шаардлага тавиад байгаа. Уг асуудалд та бүхэн ямар байр суурьтай байгаа бол?
-МАН сөрөг хүчин учраас байсхийгээд огцруулах асуудлыг тавьж байна. Гэхдээ Шинэчлэлийн Засгийн газар тийм ч муу ажиллахгүй байгаа. Эдийн засгийн тодорхой хүндрэлүүд гарсан нь үнэн. Энэ нь дэлхийн эдийн засгийн хямралын үр дагавар Монголд нөлөөлж байгаатай холбоотой. Мөн Хятадын эдийн засгийн өсөлт энэ жил  нэлээд буурсан үзүүлэлттэй байна, түүний нөлөө ч бас бий. Нөхцөл байдал амаргүй байгаа ч Засгийн газрын зүгээс Чингис бондыг оруулж ирж, нүдэнд харагдахуйц бүтээн байгуулалтын ажлыг маш сайн хийж байна.

-Ам.долларын ханшийн өсөлтөөс болж Засгийн газар, Монголбанкнаас хэрэгжүүлсэн “Үнэ тогтвор­жуулах хөтөл­бөр”-т хүндрэл учирч мэдэх нь. Тухайлбал,  нефтийн бүтээг­дэхүүнийг ОХУ-аас импортлоход нэ­лээн том зөрүү үүсэх нь ээ?
-Ам.долларын ханшийн өсөл­тийг бид ажиглаж байна. Мөн эрх барьж байгаа, энэ ажлыг хариуцаж байгаа хүмүүст ч шаардлага тавьсан. Ойрын хугацаанд тодорхой арга хэмжээ авна гэдэгт найдаж байна. Үндэсний аюулгүй байдлын зөвлөлөөс мөн анхаарал тавьж ажиллаж байгаа. Хамгийн гол нь, ам.доллар орж ирэхээ больсонд л байгаа юм. Экспортолж байгаа бүтээгдэхүүнүүд нэг тэрбум ам.долларын өрөнд явж байна шүү дээ. Тиймээс Оюу толгойн баяжмалаа нэмж гаргая, үйлдвэрлэлээ хоёр дахин өсгөж байж ам.доллараа оруулж ирье. Гадаадын банкуудаас эдийн засагтаа ам.доллар оруулж ирэх ажлыг яаралтай хийх байр суурьтай байна.