Гурав дахь жилдээ зохион байгуулагдсан язгуур урлагийн дэлхийн аварга шалгаруулах тэмцээн саяхан болж өнгөрсөн. Болгар улсад зохион байгуулагдсан энэхүү тэмцээнд Домог хамтлаг болон бусад уран бүтээлчид тун амжилттай оролцоод иржээ. Наадамд Орос, Итали, Индонези зэрэг нийт хорин дөрвөн улсын уран бүтээлчид өөрийн улсын өв соёл, уламжлалыг тусгасан тоглолтуудаар өрсөлдсөн байна. Манай улсын хувьд найруулагчаар Төрийн соёрхолт Д.Сосорбарам, Домог хамтлаг, бүжигчин Д.Энхгэрэл, уртын дуучин Э.Болормаа болон уран нугараач Г.Нямгэрэл зэрэг нийт арван долоон хүний бүрэлдэхүүнтэй оролцсон. Тус фестивальд Монголын уран бүтээлчид зургаан тоглолт хийсэн ба тоглолт тус бүрийн найруулга, хоорондын ялгаа өөрийн онцлогийг харуулсан өвөрмөц болж чадсан хэмээн хэлж байлаа. Үүгээрээ ч дэлхийн язгуур урлагийн акедемиас өндөр үнэлгээ авч дэлхийн үнэмлэхүй аварга хэмээх нэр хүндтэй шагналыг хүртжээ. Монголын сор болсон Алтайн магтаал, Жалам хар, Би монгол хүн зэрэг бүтээлүүдийг анх удаа өндөр хэмжээнд ихээхэн содон өвөрмөц хэлбэрээр найруулан тоглосон нь Монголын язгуур урлагийг дэлхий дахинд таниулах, цаашдын зам мөрийг тодотгосон томоохон үйл явдал боллоо хэмээн дүгнэсэн юм.