Нийслэлийн авто замын газрын хэвлэл мэдээллийн ажилтан Д.Оюунгэрэлтэй ярилцлаа.

-Анхны цас хаялж буй энэ үед нийслэлийн зам засварын төлөвлөсөн ажил хэдэн хувь нь дууссан бэ?
-Энэ жил улс, нийслэл, Хөгжлийн банкны гээд нийтдээ 160.5 тэрбум төгрөгийн хө­рөнгө оруулалтаар найман зам засах, шинэчлэх төсөл хэрэгжсэн. Одоогийн байдлаар 120 мянгатын уулзварын барилгын ажил /Энхтайваны гүүрээс 120 мянгатын уулзвар хүртэлх 0.6 км авто замын хамт/, Сүхбаатар дүүргийн нэгдүгээр хороо, Олимпын гудамжны 1.1 км , Цагаан да­вааны хогийн цэг хүртэлх хайр­ган хучилттай 1.66 км замыг ашиглалтад өгөөд бай­на. Харин Дандар баатарын гудамжны 0.9 км, Сэлбийн хос гүүрний өргөтгөл, Баянбүрдийн тойргоос 32-ын тойрог хүртэлх 1.7 км авто зам зэрэг нийт 15 зам, Сэлбийн хос гүүрэнд өргөтгөл шинэчлэлийн ажил хийсэн. Одоогоор нийслэлийн хэмжээнд зам засварын ажил 75 хувьтай байна.

-Одоогийн байд­лаар зас­вартай байгаа замын мэдээллийг өгөөч?
-Өнөөдрийн байдлаар Бэлхийн шинээр баригдсан замын үргэлжлэл, Сүхбаатар дүүргийн Шаргаморьт- Жиг­жи­дийн уулзвараас Гүн­тийн даваа чиглэлийн таван км, Баянзүрх дүүргийн 26 хороо, Сүхбаатар дүүргийн “MT” шатахуун түгээх станцын уулзвараас Хайлаастын эцэс хүртэлх 3.1 км авто замын засвар хийгдэж байна. Эдгээр зам ирэх сарын сүүлч гэхэд ашиглалтад орно.

-Энэ жил хотын төвийн ачаалалтай гэх замуудаа заслаа. Харин орон сууцны хороолол доторхоо хэзээ засч, шинэчлэх вэ?
-2010 оноос орон сууцны хороолол доторхи авто замыг бүхэлд нь шинэчилж эхэлсэн. Энэ жилийн хувьд  хотын төвийн дүүргүүдийн есөн байршлын орон сууцны хороолол доторхи авто замыг засахаар төлөвлөсөн ч Нийслэлийн худалдан авах ажиллагааны байгууллагаас тендерээ нээж, гүйцэтгэгчээ шалгаруулаагүйн улмаас засварын ажил оройтох шинжтэй байна.

-Өндөр хөгжилтэй ор­нуу­­дад зам нь толь шиг бай­даг хэмээдэг. Гэтэл ма­­­найд стандартын да­гуу тавьсан гэх зам маань тэгш га­даргуутай байх нь хо­вор байх юм. Энэ нь юутай холбоотой вэ?
-Улс орон болгоны авто замд тавигдах шаардлага нь өөр өөр. Энэ нь, тухайн орны уур амьсгалаас ихээхэн хамааралтай. Тий­мээс манай улсын хувьд эрс тэс цаг уур нөлөөлдгөөс шинээр тавьсан зам нь бага зэрэг хотгор гүдгэр байдаг. Монгол Улсад батлагдсан норм, стандартынхаа дагуу компаниуд маань замаа тавьж, холбогдох байгууллага нь хяналт тавьдаг. Гэхдээ явган хүний, хотын төвийн, хотын гаднах зам гээд бүгд өөр, өөр стандарттай байдаг. Стандартаараа тавьсан замыг МХЕГ, улсын болон техникийн комисс хүлээн авдаг. Харин нийслэлийн Авто замын газар захиалагч болон хяналт тавих чиг үүрэгтэй оролцдог юм.

-Жил бүр л нэг барьсан замаа хэд дахин янзалдаг гэсэн шүүмжлэл байнга гардаг. Энэ жил ч гэсэн гарлаа шүү дээ?
-Дээр хэлсэнчлэн Монгол орны эрс тэс уур амьсгал, хүнд даацын машин явснаас хотын шинээр тавьсан замд хагарал үүсэх, эвдрэх тохиолдол гардаг. Энэ тохиолдолд Монгол Ул­сын Барилгын тухай хуульд заас­наар улс, нийслэлийн комисс хүлээж авснаас хойш хоёр жилийн хугацаанд тухайн гүйцэтгэгч компани замынхаа эвдрэлийг өөрийн хөрөнгөөр дахин засч  улсыг хохиролгүй болгодог. Өөрөөр хэлбэл, татвар төлөгчдийн мөнгөөс дахин нэг ч төгрөг гаргадаггүй гэсэн үг. Энэ жилийн хувьд Хөгжлийн банкны хөрөнгө оруулалтаар хэрэгжиж буй “Шинэ бүтээн байгуулалт дунд хугацааны зорилтот хөтөлбөр”-ийн хүрээнд тухайн замыг зассанаас нь хойш гүйцэтгэгч компани нь гурван жилийн хугацаанд бүрэн хариуцна гэсэн гэрээ хийж байгаа.

-Тэгвэл засч сайжруулсан замаа хэрхэн арчилж, хамгаалдаг юм бэ?
-Зам арчлалт хамгаалалтыг Хот тохижилт болон Усны барилга байгууламж төрийн өмчит газар бүрэн хариуцдаг.

-Ирэх жилийн  зам зас­ва­­рын ажлыг гүйцэтгэх тө­­лөв­­­­­­лөгөө одоогоор гарсан уу?
-Одоогийн байдлаар 2014 оны төсвийн төсөлд зам засварын саналаа манай газраас оруулж байгаа. Улс, нийслэлийн төсөв, Замын сан зэрэг дээд шатны байгууллагууд шийдээ гаргаагүй байна.