Засгийн газрын анхны шийдвэрээр иргэд Төрийн ордондоо чөлөөтэй нэвтэрч, Төрийн түүхийн музейтэй танилцаж, Есөн хөлт цагаан тугандаа хүндэтгэл илэрхийлэн, Эзэн Чингисийнхээ хөшөөний дэргэд зургаа татуулах боломжтой болсон. Энэ ажлын үргэлжлэл болгож Төрийн түүхийн музейд бичил кино театр нээгдлээ. Дэлхийн олон орны Төрийн болоод Парламентын ордонд үзвэрийн ийм танхим байдаг бөгөөд зочдодоо зориулан үүх түүхээ таниулах богино хэмжээний кино үзүүлдэг. Ийм жишгийг бий болголоо гэж Монгол Улсын сайд, Засгийн газрын Хэрэг эрхлэх газрын дарга Ч.Сайханбилэг нээлтийн тууз хайчлахдаа хэллээ. Төрийн түүхийн музей дэх кино театрын анхны үзэгчид “Монгол төрийн түүхийн товчоо” баримтат кино үзэж сонирхлоо.