Хятадын зүүн нутгийн Жэнзян мужийг дайран гарсан “Фитоу” хар салхи хоёр тэрбум ам.долларын хохирол учруулсан байна. Мужийн 11 хотын долоон сая хүн хар салхинд өртөж, зургаан хүн амь үрэгдэн, дөрвөн хүн сураггүй алга болсон тухай “ИТАР-ТАСС” агентлаг мэдээлэв. Юйяо хотод гэхэд л хоногт 717 мм хур тунадас орсон нь энэ бүс нутагт дээд амжилт тогтоожээ. Яозян гол болон томоохон усан сангуудад далан сэтэрснийг янзлахаар армийн албан хаагчид ажиллаж байгаа тухай Хятадын төв телевизээр харуулсан байна. Их хэмжээний үер буух аюул энэ бүс нутагт арилаагүй л байна. “Фитоу” нь энэ жил  Хятадыг дайрч байгаа 23 дахь салхи юм.