МЗХ-ны Ерөнхийлөгч А.Мөнхбат, УИХ-ын гишүүн, Монголын Үндэсний Худалдаа Аж Үйлдвэрийн танхимын дарга С.Дэмбэрэлийг давхар алба хашиж Үндсэн Хуулийг зөрчсөн гэсэн үндэслэлээр  Цэцэд өгч хэвлэл мэдээллийн хэрэгслээр шуугиад авсан. Гэвч Үндсэн Хуулийн Цэцийн гишүүн Ц.Сарантуяа нь маргаан хянан шийдвэрлэхээс татгалзаж тогтоол гаргасан байна. Тэрээр үүнийгээ тайлбарлахдаа “УИХ-ын гишүүн С.Дэмбэрэл нь хуулиар зөвшөөрсөн ажил давхар эрхэлж байгаа тул Үндсэн Хуулийн Цэцэд маргаан үүсгэх үндэслэлгүй байна” гэсэн хариу өгчээ. Харин А.Мөнхбат энэ тогтоолыг эс зөвшөөрч, дахин гомдол гаргаж байгаа юм байна. Тэрээр “...Үндсэн хуулиас бусад хуулийг зөрчсөн эсэх маргааныг цэц харьяалан шийдэхгүй гэж заасан тул УИХ-ын гишүүн С.Дэмбэрэл нь бусад хуулийг зөрчсөн үү, үгүй юу гэдэг асуудлаар Цэцэд хандаагүй. Харин Үндсэн Хуулийн 29-р зүйлийн 1 дэх хэсгийн заалт буюу УИХ-ын гишүүн нь Ерөнхий сайд, Засгийн газрын гишүүнээс бусад, хуулиар тогтоосон үүрэгт нь үл хамаарах ажил албан тушаал хавсарч болохгүй хэмээн тодорхой заасан заалт зөрчигдсөн эсэх талаар Цэц хянан үзэж, шийдвэр гаргаж өгөөч гэж хүссэн. Тиймээс Үндсэн Хуулийн Цэцэд дахин гомдол гаргаж байгааг хүлээн авна уу” гэжээ. Өмнө нь УИХ-ын гишүүн С.Ганбаатар мөн энэхүү шалтгаанаар Үйлдвэрчний Эвлэлийн ерөнхийлөгчийн албанаасаа бууж байсан талаар олныг нуршаад илүүц бизээ. Гэтэл Үндсэн Хуулийн Цэц яагаад С.Дэмбэрэл даргад өөрөөр хандаж иргэний өргөдөл гомдлыг хүлээн авахгүй гэж байгаа нь олны анхаарлыг ихэд татлаа. Ямар сайндаа л Цэц хоёр нүүртэй юу  гэж хэлүүлж байхав. Харин дахин гомдол гаргасан энэхүү асуудал хэрхэн шийдэгдэх нь олны өмнө нээлттэй үлдэж байна.   


Ер нь С.Дэмбэрэл гишүүн хэсэг бүлэг бизнесийнхний эрх ашгийг хамгаалаад байгаа нь гишүүний ёс зүй, ажилтай нь ноцтой зөрчилдөж байгаа, нөгөөтэйгүүр МҮХАҮТанхим нь бизнесийнхнийг бодитойгоор бодлогоор дэмжих, тэдний өмнөөс дуугардаг хамгаалдаг, олон улсын хэмжээнд хүлээн зөвшөөрөгдөж чадахуйц алхмуудыг хийдэг томоохон байгууллага байх ёстой атал өнөөг хүртэл 20 жил нэг хүний хувийн компани шиг явж байгаа нь ч бодит үнэн. Үүнийг эрс шүүмжлэгчид, энэ байгууллагад салхи оруулж, хөгжүүлж шинэчлэх ёстой гэсэн байр суурьтай бизнесийнхэн ч олон байдаг. Ямартай ч МЗХ-ны ерөнхийлөгч А.Мөнхбат 2 сарын өмнөөс С.Дэмбэрэл гишүүний тухай асуудал гаргаж ирэхэд нэг ч компани өмөөрч үг унагахгүй байгаа нь түүнийг танхимынхаа ажлаа хэр хийж байгааг харуулж байгаа хэрэг гэж үзэж болохоор байна.

Тэгээд ч С. Дэмбэрэл УИХ-ын гишүүнийхээ үндсэн ажилдаа анхаарлаа хандуулах цаг болсон баймаар. Эдийн засаг хүндрээд байна гэж хаа хаанаа сандарч буй өнөө үед өч төчнөөн сонгогчдыг төлөөлж бас намынхаа олон гишүүдийн итгэлийг хүлээж гарч ирчихээд Их Хурал дээр эдийн засгийн асуудлаар дорвитой санаа оруулж , үгээ хэлж дуугарч чадахгүй, ойрд хүүхэндсэнгүй гэдгээ зарлаж, охид бүсгүйчүүд руу хандарч саймширч жиргэхээс өөр ажилгүй байгаа нь тун харамсалтай. Бас эрхэм гишүүнд хандаж хэлэхэд хувийн бизнес, МҮХАҮТанхимын гишүүн хэдэн бизнесийн байгууллагын төлөө ажиллах биш, УИХ-ын гишүүнийхээ ажлыг хийсэн шиг хийгээсэй гэж  хүсмээр байна.