Шотландын орон нутгийн замын нэг хэсэг газар муруй далий ийм тэмдэглэгээ хийж орхисон нь согтуу жолоочид зориулаа юу гэлтэй. Гэвч замын урсгалыг заагласан энэхүү тэмдэглэгээг ингэж тэгш бус хийсэн нь машины хурдыг сааруулах зорилготой гэнэ. Энэ замын тэмдэглэгээ холоос харахад овон довонтой, муруй тахир зам шиг харагдах тул жолооч нар болгоомжилж, хурдаа сааруулах болно хэмээн замын цагдаагийнхан тооцсон аж. Гэвч хүмүүс үүнийг харж болгоомжлохоосоо өмнө согтуу нөхөр зураа юу хэмээн шоглодог тухай орон нутгийнхан ярьжээ. Уг тэмдэглэгээ ахмад жолооч нарт ердөө таалагдахгүй байгаа бөгөөд зарим хөгшчүүд тэмдгийн дагуу явах гэж будилж орхидог тухайгаа хэвлэлд ярьжээ.