“Мангасын хаан ядуу ядуу хүүтэй шатар тоглоод хэн хожсон нь нөгөөгийнхөө толгойг авъя гэж гэнэ” гээд монгол ардын үлгэр байдаг.
Гэтэл яг үүнтэй төстэй явдал  германы нэрт хөл бөмбөгч, дасгалжуулагч Франц Беккенбауртэй тохиолдож гэнэ. Гэхдээ ганц түүний толгой биш, харин манай дэлхийг бооцоонд тавих гэсэн байна. Хөл бөмбөгийн “Баварии” багийн хүндэт ерөнхийлөгч тэрээр нэг сонин илгээлт бичиж дүрс бичлэгээр тараажээ. Түүнийхээр бол харь гаригийнхан манай дэлхийд ирж хөл бөмбөг тоглоод хэрэв дэлхийнхэн хожигдох юм бол манай дэлхийг сөнөөнө гэжээ. Тэгэхээр дэлхийн баг тэднийг хожвол дэлхийгээ аварч болох гэнэ. Тэр бичлэгт  “Сайн байцгаана уу, ноёд хатагтай нар аа. Би хөлбөмбөгч, дасгалжуулагч байсан Франц Беккенбауэр байна. Харь гаригийнхан байдаг уу, тэд спортоор тоглодог уу гэж асуу даа. Би та нарыг гайхшруулахаар хариу өгнө. Энэ хоёр  асуултад би хоёуланд нь “тийм” гэж хариулна. Өнгөрсөн шөнө  надтай харь гаригийн нөхөд ирж уулзсан. Үнэхээр өөр гаригаас ирсэн хүмүүс. Тэд бидэнтэй хөл бөмбөг тоглоё гэж  байна. Хамгийн хэцүү нь тэд ялах юм бол Дэлхийг устгана гэж байна. Тэгэхээр бид багаа бүрдүүлэх ёстой. Тэр баг л манай гаригийг аварна. Холбоо бариарай, нөхөд өө” гэж 68 настай хөл бөмбөгч ярьжээ.
Үүний дараахан Беккенбауэр өөрийнхөө Твиттерт харь гаригийхантай тоглох хөл бөмбөгийн тэмцээн 2013 оны арваннэгдүгээр сарын 1-нд болно гэсэн шинэ мэдээлэл оруулсан байгаа гэнэ.