Хөх өнгө бол ихэс дээдэс, язгууртнуудын дурладаг өнгө. Диана гүнж ийм өнгийн даашинз олонтой, түүгээрээ чухал ёслолуудад гоёдог байв. Тэгвэл өнөө үеийн хамгийн үзэсгэлэнт гүнж болох Монакогийн хунтайжийн гэргий Шарлен өөрийн буяны сангийн хүлээн авалтад оролцохоор ирэхдээ хөх өнгийн хамба хилэн даашинзаар гоёсон байсан нь хурсан олны нүдийг аргагүй унагаж байжээ. Даашинз нь хэдий энгийн загвартай ч тамирчин асан бүсгүйн гоолиг биед гайхамшигтай сайхан зохижээ. Шарлен гүнжийн удирддаг "Aутизмын эсрэг Монако" сан нь энэ өвчний талаар олон нийтэд мэдээлэх, өвчний эсрэг судалгаа, эмчилгээний арга нээх бүхий л төрлийн үйл ажиллагааг дэмжин санхүүжүүлэх зорилготой аж.