Дэлхийн алдартай “Circus on Ice” буюу Мөсөн циркийн тоглолт энэ бямба гарагт болох гэж байна. “Монгол Циркийн хөгжлийн төв” ТББ-аас санаачлан зохион байгуулж буй эл тоглолтын тасалбар суудлынхаа байрлалаас хамаарч  10-30 мянган төгрөгийн үнэтэй гэнэ. Энэ талаар зохион байгуулагч Н.Эрдэнэ “Тоглолтын бэлтгэл ажил үндсэндээ хангагдаж байна. Юрий Никулины нэрэмжит Москвагийн мөсөн циркийн 28 жүжигчин циркийн бүх төрлийн үзүүлбэрийг мөсөн манежид тоглох юм. Манайд мөсөн циркийн тайз заслын энэ төрлийн мэргэжилтэн байхгүй учраас мэргэжилтнүүдтэйгээ ирсэн. Харин гэрэлтүүлэг, хөгжмийг “Саунд оф Монголиа” компанийнхан хариуцаж ажиллана” гэлээ.
Дашрамд, дэлхийн хэмжээнд таван мөсөн цирк байдаг бөгөөд гурав нь Москвад байдаг аж. ОХУ-д үүссэн циркийн урлагийн энэ төрөл 1964 оноос хойш цирк үзэгчдийн хамгийн дуртай урлагийн төрөл болсон юм.