Баянхонгор аймгийн Засаг дарга Д.Жаргал­сай­ханыг “Ярилцах танхим”-даа урьж, цаг үеийн асууд­лаар ярилцлаа.

-Засгийн газраас шил­дэг аймгуудыг шал­га­рууллаа. Танай аймаг тавдугаар байрт шал­гарсан нь өнгөрсөн онд Засгийн газартай бай­гуулсан гэрээнийхээ бие­лэлтийг сайн хангасны илрэл юм болов уу. Ямар үзүүлэлтүүдийг хангасны үндсэн дээр шилдэг айм­гуудын тоонд оров оо?

-Засгийн газар өнгөрсөн жилээс аймгийн удирдлагуудтай хамтран ажиллах гэрээ байгуулж эхэлсэн нь үр дүн өгч байгаа. Баянхонгорчуу­дын хувьд 30 орчим үзүүлэлтийг хангасны үндсэн дээр шилдэг аймгуудын нэгээр шалгарсан. Үүнд  сэтгэл хангалуун байгаа. Манай аймаг бүтээн байгуулалтынхаа салбараар улсдаа дээгүүрт орж байна. Азийн хөгжлийн банкны 2301 төслийн хүрээнд цэвэр усны хүртээмжийг дөрөв дахин нэ­мэгдүүллээ. Мөн шингээх цооног, ариутгах төхөөрөмжийн хүчин чадлыг дөрөв дахин нэмэгдүүл­сэн. Иргэдийг орон сууцжуулах хөтөлбөрийн хүрэнд 500 гаруй айлыг шинэ орон сууцанд оруул­лаа. Улаанбаатар хоттой аймгийн төв хатуу хучилттай авто замаар холбогдсон. Аймгийн төв доторх хатуу хучилттай замуудыг сэргээх ажлыг эрчимтэй хийлээ. Утааныхаа асуудлыг утаагүй зуух тараах за­маар тодорхой хэмжээнд шийдсэн. Бизнесийн салбарт ажиллаж бай­гаа компаниудаа дэмжих зорилгоор хөнгөлөлттэй зээл олгож, барил­гын материал үйлдвэрлэх ажлыг эрчимтэй дэмжиж ажиллалаа.  
-Танай аймаг хамгийн анх шинэ сум төслийг хэрэгжүүлсэн. Үүгээрээ бусад аймгаас ялгарах дахин нэг онцлогтой болсон. Энэхүү ажлын санхүүжилтийн өртөг валютын ханшны өөрч­лөлтөөс болоод нэмэгдсэн гэж байсан. Асуудлыг хэрхэн шийд­вэрлэв?

-Шинэ сум төслийг хэрэг­жүү­лэхэд 14.5 тэрбум төгрөг шаард­лагатай гэж баталсан ч улсын тө­сөвт 10 тэрбум төгрөг суулгасан. Үүний цаана 4.5 тэрбум төгрөгийн зө­рүү гарч санхүүжилтын гачиг­дал үүс­сэн. Мөн инфляци нэмэгдэж, нэг су­манд 6-7 тэрбум төгрө­гийн сан­хүү­жилт шаардлагатай бол­сон. Ул­саас төсөвлөсөн мөнгөнд нь тааруулаад нэг барилгыг хасах боломж байсан. Гэхдээ манай тойргоос сонгогдсон УИХ-ын гишүүн Х.Баттулга анх удаа хэрэгжиж байгаа энэ төслийг тойрогтоо хэрэгжүүлэхдээ аль нэг барилгыг нь хасах сонирхолгүй байна гэдгээ хэлсэн. Энэ ч үүднээсээ үлдсэн санхүүжилтийг нь хувиасаа ч гаргасан бай хамаагүй барилгын ажлыг зогсоохгүйгээр явуулах ёстой гэсэн зарчмыг баримталж байгаа. Гүйцэтгэгч компаниуд маань ч бас ашиг хонжоо харалгүйгээр аль аль талдаа хичээн ажиллаж байна. Тиймээс олон хүний сэтгэл шингэсэн, дэмжлэг авсан энэхүү шинэ сум төслийн ажил гацахгүйгээр дуусна гэдэгт итгэлтэй байгаа.

-Танай аймгийн гурван су­мыг эрчим хүчтэй холбох ажил удаашралтай байгаагаас болж асуудал дагуулаад байгаа. Энэ ажил юу болж байна?

-Шинэжинст, Баянлиг сумыг эрчим хүчтэй холбох тендерийн ажлыг түрүүчийн Засгийн газрын үед “Ойгон нуур” гэдэг компани хариуцаж авсан байдаг ч одоо болтол шалтаг тоочсон хэвээр л байна. Энэ асуудлыг манай тойр­гоос сонгогдсон УИХ-ын гишүүн Д.Ганбат хариуцаж ажиллаж бай­на. Энэ хүрээнд Ерөнхий сайд Н.Алтанхуяг, Эрчим хүчний сайд М.Сономпил нарт хүсэлт тавьж ажил бага ч гэсэн урагшилж байгаа. Гэхдээ дургүйд хүчгүй гэдэг байдлаар арай л зогсчихгүйгээр ажлаа явуулж байна.

-Шинэ сум төсөл, эрчим хү­чээр хангах ажил бол томоо­хон бүтээн байгуулалт мөн. Гэхдээ энэ бол Засгийн газраас танай аймагт хэрэгжүүлж буй ажил. Ха­рин та Засаг даргын ажлаа авснаас хойш Баянхонгор аймагт ямар ажил хийсэн байна вэ?

-Иргэдэд төрийн үйлчилгээг түргэн шуурхай, ил тод хүргэх нь төрийн үндсэн чиг үүрэг. Энэ ч үүднээс би төрийн үйлчилгээний хамгийн анхан шатны нэгж болох багийн төвүүд дээр нэлээд анхаарал хандуулж ажиллалаа. Манай аймаг 104 багтай. Багийн иргэд сумын төв рүү орж бүх үйлчилгээг авдаг асуудлыг халъя гэж байгаа юм. Тэр ч үүднээс төрийн анхан шатны үйлчилгээг түргэн шуурхай болгож, иргэдэд байгаа газарт нь хүрч ажиллах орчинг бүрдүүлэхийн тулд 24 багийн төвийг шинээр барьж ашиглалтад хүлээлгэж өглөө. Ингэж чадсанаар багийн удирдлагуудаа ард иргэддээ үйлчил гэж шаардах эрхтэй болсон гэх үү дээ. Нөгөөтэйгүүр, сумын удирдлагуудад улиралд нэгээс доошгүй удаа айл өрхүүдээрээ орж төрийн үйлчилгээг үзүүлэх  шаардлага тавьж байгаа. Хэрэв баг, сумын удирдлагууд иргэддээ төрийн үйлчилгээг үзүүлээгүй бол цалин, хангамжтай нь ярих хариуцлагын асуудлыг нэвтрүүлж байна. Баг, сумын удирдлагуудыг ажлаа хэрхэн хийж байгаад иргэд дүн тавина. Энэ боломжийг иргэдэд нээж өгөхийн тулд бид өрхийн дэвтэр гэгчийг гаргасан. Эхлүүлсэн ажил маань үнэхээр үр дүнгээ өгч байгааг иргэд ярьж байна. Тухайлбал, “Энэ дарга үзэгдсэнгүй хариуцлагын асуудал ярина” гээд сууж байна. Ингэж байж л төрийн ачаа хөнгөрнө. Өнөөдөр бид иргэдийнхээ сэтгэлгээг өөрчилж байж л өрсөлднө үү гэхээс биш аль нь том байшин, барилга барьснаараа өрсөлдөхгүй шүү дээ. Бид хүнээ хөгжүүлэхгүйгээр ахиж дэвшинэ гэж байхгүй. Түүнээс биш “Амьгүй албат” шиг ард иргэдийг халамжилж, тэтгэж, тэжээх гээд явах нь байж болохгүй асуудал. Ийм боломж манай улсад байхгүй.

-Ирэх онд ямар ямар ажил хийхээр төлөвлөсөн байгаа вэ?

-Манай аймгийнхны хувьд өнгөрсөн жил маш сайхан байлаа. Өнгөрсөн жил эхлүүлсэн ажлуудаа үргэлжлүүлж, 1000 айлын орон сууц, 200 айлын хаус хороолол барьж ашиглалтад оруулна. Мөн ирэх онд дулааны станц ашиглал­тад оруулахаар төлөвлөсөн. Нийт 20 гаруй багийн төвийг шинээр ашиглалтад оруулна. Сумуудыг инженерийн шугам сүлжээнд хол­бож, орон сууцны хорооллууд барих ажлыг эхлүүлнэ. Энэ хүрээнд ерөнхий төлөвлөгөөнүүдийг хийж байна.

-Ярилцсанд баярлалаа. Танд амжилт хүсье.