Сирийн иргэний дайны золиос болж, бөмбөгөнд өртөн эмнэлэгт очсон ч эмч нар амийг нь аварч дийлээгүй гуравхан настай хүүгийн хэлсэн сэтгэл сэртхийлгэм үгийг манай сайт ням гарагт нийтэлсэн. Амьсгал хурааж байхдаа  “Та бүхнийг бурхан ивээх болтугай. Энэ бүхнийг би түүнд хэлнэ ээ” гэсэн түүний насандаа баймгүй хэрсүү үг тэнд байсан эмч, эмнэлгийн ажилтнууд, бусад шархтнуудын  сэтгэлийн утсыг хөндсөнөөс гадна энэ мэдээллийг уншсан хүн бүрийн нулимсыг өөрийн эрхгүй гаргажээ.

Энэ мэдээг манай сайт нийтлээд бүтэн хоног ч өнгөрөөгүй байхад 200 гаруй уншигч фейсбүүкээр цааш нь тарааж дор нь сэтгэгдлээ үлдээсэн байна. Энд “Ямар өрөвдөлтэй юм бэ, зүрх шимширчихлээ. Хүн бүр аз жаргал амсах ёстой” гэсэн байхад олон хүн “Монголд төрөх болтугай” гэжээ. Нэг уншигч “Хөөрхийдөө, өрөвдөлтэй юм аа. Бурхан үгийг нь сонсоод хариуд нь Монголд төрүүлээрэй. Бурхан ивээг” гэжээ. “Уншаад дотор эвгүй болчихлоо”, “Өөрийн эрхгүй нулимс гарлаа”  гэж олон уншигч  бичсэн бол “Ямар хэцүү юм бэ дээ, Зүрх шимширчихлээ. Дараа төрөлдөө жаргах болтугай” гэжээ. Лувсанбалдангийн Отгонбаяр гэдэг уншигч “Ямар ухаантай юм бэ, гуравхан настай гэхэд....Сайн төрөлд төрөх болтугай” гэсэн бол Сараа “Ийм жоохон хүүхэд хүртэл ийм ухаантай байх гэж. Ум ма ни бадми хум” гэжээ. Отгоо “Дайн дажингүй тайван оронд эргэж хүн болж төрөөрэй” гэсэн байхад Хүрэлбаатарын Сараа “Сэтгэл өвдчихлөө, нулимсаа барьж чадсангүй”, П.Уянгасайхан “Бурханд хэлж энэ дайныг зогсоохыг хүү хүсчээ” гэсэн байна. А.Сосорбарам “Юугаа булаалдаж байлддаг байна аа. Эвий дээ. Бурхантай уулзаасай”, Номинзул “Эвий яасан хэцүү юм бэ, дайн дажин хурдан дуусаасай” гэжээ.  Жоохноо “Хүүхэд бүр аз жаргалтай гэр бүлд өсч торниосой” гэх мэтээр сэтгэгдлээ бичжээ. Өөрийгөө D  гэсэн уншигч “Монголд төрвөл зүлгэн дээр  зүгээр л гэрээ барьсан хөдөөний сайхан айлд төрөөд энэ насан дээрээ дан цамцтай боожгоогоо унжуулчихаад хурга ишигтэй тоглоорой. Монгол нохой хүртэл чамайг хайрлана аа, хүү минь. Бурхан чамайг ивээх болтугай” гэсэн байна.
Энэ жижигхэн ч сэтгэл сэртхийлгэж, юм бодогдуулсан мэдээг уншиж, цааш цаашаа түгээж, сэтгэгдлээ үлдээсэн монгол түмэндээ талархлаа. Монголчууд минь ямар ч сайхан сэтгэлтэй, өр зөөлөн ард түмэн бэ. Аав ээжээ баярлуулан төрчихөөд гайтай дайны золиос болж цагаасаа өмнө буцсан ч, хүн төрөлтөнд үгээ хэлчихээд, ухаарал хайрлаад одсон бяцхан жаал нээрээ монгол хүний амны бэлгээр бурхны оронд очоод,  амар тайван монгол оронд минь хөөрхөн хүү болж төрөх болтугай.

Үхэж байгаа гурван настай хүүгийн үг дэлхийг цочоолоо
http://www.assa.mn/content/19867.shtml?a=world
Мэдээг нь энэ линкээр орж үзэж болно