ЭЦГ-ын хүн худалдаалах гэмт хэрэгтэй тэмцэх хэлтсээс Монгол охидыг Номхон далайд орших Сайпан арал руу хил давуулан худалдахаар зэхсэн этгээдийг саатууллаа.

ЭЦГ, УМБГ, ТЕГ-ын хамтарсан ажлын хэсэг таван сарын турш дээрх хэргийг шалгаж баримтжуулсны эцэст энэ сарын 24-ний өдөр АНУ-ын иргэн Манао Патрик Иөрл гэгчийг Хан-Уул дүүргийн 9 дүгээр хорооны нутаг дэвсгэрээс баривчилжээ. Сэжигтэн М.П.Иөрл нь 1973 онд Тайвань улсад төрсөн, 40 настай, америк гаралтай бөгөөд 2008 оны наймдугаар сарын 18-нд Монгол улсад ирж  улмаар Монгол улсын иргэн Ө-тэй хамтран амьдрах хугацаандаа хоёр хүүхэдтэй болжээ. Мөрдөн байцаалтын явцад АНУ-ын иргэн Патрик нь өнгөрөгч 2013 оны зургадугаар сараас эхлэн нийт 16 эмэгтэйгээс тус бүр визний зураг, гадаад паспортын  хуулбар, визний мөнгө гэх 1000 америк доллар авч Сайпан аралд үйл ажиллагаа явуулдаг “Кингс” гэх цэнгээний газарт ажилд зуучлах нэрээр  хил давуулан худалдаалах гэж байсныг тогтоожээ. Мөн хохирогч эмэгтэйг “Маш их хэмжээний мөнгө олж, цаашдаа баян эрчүүдтэй танилцан хамтран амьдрах боломжтой гэж ятгасан” хэмээн мэдүүлжээ. Дээрх хэргийн баримтаар 11 эмэгтэйн бичиг баримтыг визэнд оруулахаар бэлтгэсэн таван эмэгтэйн материал, охидын нүцгэн фото зургийг хураан авч УМБГ-т үргэлжлүүлэн шалгаж байна.
Номхон далайд байрлах Сайпан арал АНУ-ын газар нутагт оршдог бөгөөд 48 мянга гаруй хүн амтай. Тус арлын оршин суугчдын дийлэнх нь БНХАУ, Бангладеш, Филиппин, Тайланд, Вьетнам, Камбожи улсын иргэд байдаг аж. Мөн Япон, БНХАУ, БНСУ-аас цагаачид болон гадны жуулчид ихээр ирдэг ба тус арал нь цэнгээний үйл ажиллагаа явуулдгаараа алдартай юм.