Японы төвийн бүст сүүлийн хэдэн арван жилд ороогүй их хэмжээний цас унаснаас 11 хүн нас барж, 1,2 мянган хүн осолд өртөөд байна хэмээн NHK мэдээллээ. Бямба гаригийн өглөөнөөс Токио хот болон төвийн зарим хотуудад цас орж, 27 см хүртэл зузаарч тогтжээ. Цаг уурынхны баталснаар энэ бол сүүлийн 45 жилд ороогүй их хэмжээний цас гэнэ.  Харин Сэндай хотод цасны зузаан 35 см хүрсэн нь сүүлийн 78 жилд тохиолдоогүй байгалийн үзэгдэл болоод байгаа аж.

 Энэхүү байгалийн үзэгдлийн улмаас Канагава хотод 215 хүн осолд өртөж, хүнд хөнгөн гэмтсэн бол Токиод 159 хүн эмнэлэгт хандсан байна. Исикава, Наганогийн автозамын гулгаа ихэссэнээс гарсан авто ослын улмаас 4 хүн нас барсан гэнэ. Цаг агаарын байдал муудсаны улмаас 400-гаад дотоодын нислэг нь хойшилсон байна. Наритад 6 мянган хүн одоогоор онгоц хүлээн гацаад байгаа аж. Зөвхөн нислэг гэлтгүй төмөр замын зарим шугамыг ч зогсооход хүрсэн байна. Токиогийн ойролцоох Тиба, Ибараки мужийн 61 мянган өрх гэрэл цахилгаангүй болсон бөгөөд Фүкүшима орчмын 3,5 мянган өрх цөмийн станцын ослоос үүдэлтэйгээр өнөөдөр ч цахилгаантай болж чадаагүй байна.  Цаг уурынхан цас ирэх бүтэн сайн хүртэл орох төлөвтэй байна. Цасны зузаан 50 см хүрэх учраас оршин суугчдыг болгоомжтой байхыг анхааруулсан байна.