Хот гэдэг их айл. Өрхөөр төлөөлүүлбэл хоёр идэхгүй, хоосон хонохгүй амьдралаа залгуулж л яваа олон гэр бүлийн нэг. Гэхдээ олон хүүхдийнхээ өмсөх хувцас, идэх хоолыг нь таслахгүйн тулд гэрийн эзэн орлого зарлагаа сайн төсөвлөн зарцуулбал бас ч асуудалгүй мэт. Энэ л дүр төрхийг харуулсан нийслэлийн удир­дах ажилтнуудын ээлжит шуур­хай зөвлөлгөөн өчиг­дөр боллоо. Хотын удирд­лагуудад дүүрэгт нь тул­гам­даж буй асуудлаа та­нилцуулан шийдүүлдэг эл зөвлөлгөөнийг дүүргийн За­саг нар “толгойн өвчнийг эдгээ­дэг талбар” хэмээн хо­шиг­нох нь ч бий.
Салхийг нь хагалж Баян­зүрх дүүргийн Засаг дарга Д.Пүрэвдаваа “Манай дүүр­гийн  27 дугаар хорооны ба­ригдаж дууссан ч ашиглах боломжгүй цогцолбор ба­рилгын асуудлыг яаралтай шийдэх шаардлагатай бай­на” гэж танилцууллаа. Уг барилгын ажил 2010 онд эхэлсэн бөгөөд өнөөдрийг хүртэл хоёр удаа нийт 521 сая төгрөг нийслэлийн төсөвт тусгаж зарцуулсан гэнэ. 2013 онд хорооны цогцолбор байрыг барьж дуусган холбогдох байгуул­лагад хүлээлгэж өгөх бай­сан ч  байрны суурийн хана­наас ус шүүрсэн  тул ашиглах боломжгүй гэгдэн ашиглалтад ороогүй байна.  Тиймээс дүүргийн ЗДТГ-аас 2010 оны арванхоёрдугаар сарын 24-нөөс хойш нийтдээ  байрны түрээст  16 сая төгрөг зарцуулан тус хороог ажиллуулж байна гэв.
Түүнчлэн тэрээр сурагчид нь дүүргийнхээ сургуулиудад хуваагдан суралцаж буй 14 дүгээр сургууль, цэцэрлэ­гүү­дийнхээ барилгын асуудлыг ч танилцуулахаа мартсангүй. Мэргэжлийн хяналтын газраас ашиглах боломжгүй гэсэн дүгнэлт гарсан ч, тус сургуулийн барилгыг  2014 оны төсөвт буулган, дахин барих хөрөнгө суулгаагүй нь асуудал дагуулж байгаа гэнэ. Үүнтэй адил 150 хүүхдийн хүчин чадалтай 146 дугаар цэцэрлэгийн барилгыг буулгаж, шинээр бариулах шийдвэр гарсан ч буулгах, шинээр барих төсөв хөрөнгө шийдэж өгөөгүйд гомдолтой байгаагаа хэлэв. Өнөөдөр 14 дүгээр сургуулийн 2568 сурагчаас бага сургуульд 1-3 дугаар ангийн 864 сурагч гурван ээлжээр хичээллэж, үлдсэн 1704 сурагч 92, 44, 30 дүгээр сургуульд гурван ээлжээр суралцаж байгаа гэнэ. Харин 146 дугаар  цэцэрлэгийн 80 хүүхдийн хувьд 115, 126, 52, 82, 72, 191 дүгээр цэцэрлэгт сурч байгаа бол  50 хүүхэд нь огт цэцэрлэгт хамрагдаж чадаагүй байна.  Тиймээс сургууль, цэцэрлэгийн барил­гын хөрөнгийг шийдвэрлэх шаардлагатайг нийслэлийн Засаг даргад уламжиллаа.
Харин Багахангайн Засаг дарга С.Эрдэнэ­баяр дүүргийнх нь нэгдүгээр хо­роонд байрладаг 150 хүүх­дийн хүчин чадалтай  цэцэр­лэгийн барилгыг улсын ко­мисс хүлээж авахгүй бай­на хэмээн гомдоллов. Нийс­лэлийн Засаг даргыг анхаа­рал­даа авахыг хүссэн эл цэцэрлэгт 190 хүүхэд суралц­даг бөгөөд 2008 онд БСШУЯ-ны захиалгаар 349 сая төг­рө­гөөр “Хөвсгөл зам трейд ХХК” барьж өгсөн аж. Гэвч 2009 онд нэгдүгээр давхрын хоёр ангийн танхимд суулт өгч, 2013 онд нийслэлийн хөрөнгө оруулалтаар 79,2 сая төгрөгөөр дахин засвар хийсэн гэнэ. Гэвч 2010 оны аравдугаар сарын 6, 2012 оны есдүгээр сарын 3- нд НМХГ-аас цэцэрлэгийн үйл ажиллагааг зогсоох акт гаргажээ. Тэрээр “Чанаргүй цэцэрлэгийн барилгаас шалт­гаалан ямар нэгэн эрсдэл гар­вал хэн хариуцлага хү­лээх нь тодорхойгүй байна. Яа­ралтай энэ асуудлыг шийд­вэрлэвэл дүүрэг албан ёсоор ашиглалтад хүлээн авах хэрэгтэй байна хэмээн учирлав.
Баянгол дүүргийн Засаг дарга Д.Оросоогийн хувьд “Манай дүүрэгт согтуугаар үйлдэж буй гэмт  хэрэг эрс нэмэгдлээ. Энэ нь, хууль, журмыг удаа дараа зөрчиж буй зарим баар, цэнгээний газартай холбоотой. Манай дүүрэгт үйл ажиллагаа явуулдаг “Стрингс”, “Санко”, “Турбо” гэх гурван баарыг хууль зөрчиж ажилласан гэж 3-4 удаа торгосон. Гэвч бидэнд үйл ажиллагааг нь зогсоох эрх байдаггүй. Тиймээс НЗАА-нд энэ талаарх хүсэлтээ уламжилсан. Гэвч үйл ажиллагааг нь зогсоох эрх байхгүйг мэдсэн тэд биднийг үл тоон өнөөдөр ч хууль зөрчин ажилласаар байна. Иймд энэ асуудлыг яаралтай шийдэхийн сацуу дүүрэгт эрх мэдлийг нь шилжүүлж болохгүй юм уу гэж асуумаар байна” хэмээн хүсэлтээ уламжлав.
Хан-Уул дүүргийн  Засаг дарга Ж. Ганхуяг “Манай дүүргийн 15 дугаар хорооны нутаг дэвсгэрт байрлах “UB таун,” “Хавай таун”-ы бохир халиад хэцүүхэн байдал үүслээ. Инженерийн асуудлыг шийдлээ гэхэд Олимп хотхоны орчим хийх шинэчилсэн төлөвлөгөөнд цэцэрлэг, сургууль тусгаагүй. Энэ нь эргээд дүүргийн хэдхэн сургууль, цэцэрлэгийн ачааллыг ихэсгэлээ. Шийдэж өгөх арга байна уу хэмээн учирлав.
Ямартай ч, дүүргийнх нь нутаг дэвсгэрт тулгарч буй асуудлыг сонссоны дараа хотын мэр нийслэлийн удирд­лагын зөвлөлийн хурал­даанд оруулж, холбог­дох албаны хүмүүсийг байлцуулан хэлэл­цэх нь оновчтой хэмээн үзсэн юм. Асуудлаа л нарийн төлөвлөж танилцуулахыг ч дүүргийн Засаг дарга нарт ч захилаа.